క్షేమంగా కాకినాడకు చేరుకున్న మత్స్యకారులు

కాకినాడ : సముద్రంలో వేటకు వెళ్లి 23 రోజులుగా ఆచూకీ లేకుండా పోయిన ఓడలరేవు గ్రామానికి చెందిన ఏడుగురు మత్స్యకారులు ఎట్టకేలకు క్షేమంగా కాకినాడకు చేరుకున్నారు. రాష్ట్ర ప్రభుత్వం చేపట్టిన చర్యలతో బెంగాల్‌ నుంచి వారిని ఎపి కి తీసుకురావడంతో మత్స్యకారుల కుటుంబాల్లో ఆనందం వెల్లివిరిసింది. ఈ నెల 3 న ఏడుగురు మత్స్యకారులు సముద్రంలో వేటకు వెళ్లారు. అయితే వారి పడవ ఇంజిన్‌లో సాంకేతిక సమస్యలు తలెత్తడంతో సముద్రంలోనే చిక్కుకుపోయారు. దీంతో కుటుంబసభ్యులు తీవ్ర ఆందోళనకు గురయ్యారు. మత్స్యకారుల ఆచూకీ కోసం అధికారులు, కుటుంబసభ్యులు ప్రయత్నాలు ప్రారంభించారు. ఇంజిన్‌ పనిచేయకపోవడంతో మత్స్యకారులు తెరచాపను ఉపయోగించుకుని సముద్రంలో నీటివాలుగా ప్రయాణించారు. అలా కష్టపడి చివరకు బెంగాల్‌ తీరానికి చేరుకున్నారు. సుదీర్ఘ ప్రయాణం అనంతరం ఏడుగురు మత్స్యకారులు బెంగాల్‌లోని శంకర్‌పూర్‌ జెట్టి వద్దకు చేరుకున్నారు. అక్కడ వారు క్షేమంగా ఉన్నట్లు సమాచారం అందడంతో కుటుంబసభ్యులు ఊపిరిపీల్చుకున్నారు. మత్స్యకారులను స్వస్థలానికి తీసుకువచ్చేందుకు రాష్ట్ర ప్రభుత్వం చర్యలు చేపట్టింది. ప్రభుత్వ ప్రయత్నాల ఫలితంగా బెంగాల్‌ నుంచి వారిని ఎపి కి తీసుకువచ్చారు. కాకినాడకు చేరుకున్న మత్స్యకారులకు ఎమ్మెల్యే వనమాడి కొండబాబు స్వాగతం పలికారు. ఎమ్మెల్సీ రాజశేఖర్ కూడా మత్స్యకారులను కాకినాడలో కలిసి స్వాగతించారు. 23 రోజుల తర్వాత తమ కుటుంబ సభ్యులు క్షేమంగా తిరిగి రావడంతో మత్స్యకారుల కుటుంబాల్లో సంతోషం వెల్లివిరిసింది. ఇంతకాలం సముద్రంలో వారు ఎదుర్కొన్న పరిస్థితులపై కుటుంబ సభ్యులు ఆందోళన చెందారు. సముద్రంలో చిక్కుకున్న ఏడుగురు మత్స్యకారులను సురక్షితంగా రాష్ట్రానికి తీసుకురావడంలో ప్రభుత్వం చేసిన కృషికి కుటుంబ సభ్యులు, స్థానికులు కృతజ్ఞతలు తెలిపారు. ఈ ఘటనతో 23 రోజులుగా కొనసాగిన ఉత్కంఠకు తెరపడింది.