- ఇద్దరు రాష్ట్ర మంత్రులు ఉండటంతో రెండు గంటల ఉత్కంఠ
- భారీ వర్షాలతో సిగ్నల్ వ్యవస్థలో అంతరాయం
ప్రజాశక్తి - విజయనగరం ప్రతినిధి: భారీ వర్షాల కారణంగా భోగాపురం విమానాశ్రయంలో ల్యాండ్ కావాల్సిన ఎయిర్ ఇండియా IX 1373 విమానం దారి మళ్లింది. బుధవారం రాత్రి 8.35 గంటలకు విజయవాడ నుంచి భోగాపురానికి బయలుదేరిన ఈ విమానం రాత్రి 9.40 గంటలకు భోగాపురంలో ల్యాండ్ కావాల్సి ఉంది. అయితే ఆ సమయంలో భోగాపురం పరిసరాల్లో భారీ వర్షం కురవడంతో సిగ్నల్ వ్యవస్థలో అంతరాయం ఏర్పడినట్లు సమాచారం. దీంతో విమానాన్ని భోగాపురంలో ల్యాండ్ చేయకుండా నాగపూర్కు దారి మళ్లించారు. ఈ విమానంలో రాష్ట్ర మంత్రులు అచ్చెన్నాయుడు, కొండపల్లి శ్రీనివాస్ ఉన్నారు. విమానం భోగాపురంలో దిగకపోవడంతో ప్రయాణికుల్లో కొంతసేపు ఉత్కంఠ నెలకొంది. సుమారు రెండు గంటల అనంతరం విమానం నాగపూర్ విమానాశ్రయంలో సురక్షితంగా ల్యాండ్ కావడంతో ప్రయాణికులు ఊపిరిపీల్చుకున్నారు. విమానం సురక్షితంగా ల్యాండ్ కావడంతో అధికారులు, ప్రయాణికుల కుటుంబ సభ్యులు ఆందోళన నుంచి బయటపడ్డారు.
కామెంట్లు (0)