- డివైడర్‌ను ఢీకొని విద్యుత్‌ కారు దగ్ధం
- చిన్నారితో సహా నలుగురు సజీవదహనం
- మరో మహిళకు తీవ్ర గాయాలు
ప్రజాశక్తి- ఎన్‌‌టిఆర్‌ జిల్లా ప్రతినిధి : ఎన్‌‌టిఆర్‌ జిల్లా విజయవాడ వెస్ట్ బైపాస్‌పై సోమవారం ఘోర రోడ్డు ప్రమాదం జరిగింది. జాతీయ రహదారిపై అంబాపురం-గొల్లపూడి మధ్య ఇవి కారు డివైడర్‌ను ఢీకొని మంటలు చెలరేగి దగ్ధం కావడంతో ఏడాదిన్నర చిన్నారితో సహా నలుగురు సజీవదహనమయ్యారు. మరో మహిళ తీవ్రంగా గాయపడ్డారు. పోలీసులు, స్థానికులు తెలిపిన వివరాల ప్రకారం... విజయవాడ రూరల్‌ మండలం నున్నకు చెందిన కొమ్మారెడ్డి రాందేవ్ రెడ్డి (39), ఆయన తల్లి కొమ్మారెడ్డి అరుణ (56), కుమారుడు మహాత్ర (ఏడాదిన్నర), గుంటూరు జిల్లా పెదకాకాని మండలం నంబూరుకు చెందిన భీమవరపు విజయ (48), హైదరాబాద్‌ మెహదీపట్నానికి చెందిన తియ్యగూర అరుణ కలిసి గుంటూరు జిల్లా నంబూరులో జరిగిన శుభకార్యానికి హాజరై తిరిగి విజయవాడకు ఇవి కారులో బయలుదేరారు. మార్గమధ్యలో వారి వాహనం డివైడర్‌ను ఢీకొనడంతో ఒక్కసారిగా మంటలు చెలరేగి పూర్తిగా దగ్ధమైంది. ఈ ప్రమాదంలో రాందేవ్ రెడ్డి, అరుణ, మహాత్ర, విజయ అక్కడికక్కడే సజీవ దహనం అయ్యారు. అరుణకు తీవ్ర గాయాలవడంతో స్థానికులు ఆమెను ఆస్పత్రికి తరలించారు. ఆమె పరిస్థితి విషమంగా ఉన్నట్లు సమాచారం. పోలీసులు ఘటనాస్థలికి చేరుకుని సహాయక చర్యలు చేపట్టారు. మృతదేహాలను పోస్టుమార్టం నిమిత్తం విజయవాడ ప్రభుత్వ జనరల్ ఆస్పత్రికి తరలించారు. ప్రమాదానికి కారణాలపై దర్యాప్తు చేస్తున్నారు. రాందేవ్ రెడ్డి తండ్రి కొమ్మారెడ్డి సుబ్బారెడ్డి ఇటీవల గుండెకు శస్త్రచికిత్స చేయించుకున్నారు. రోడ్డు ప్రమాదంలో కుటుంబ సభ్యులు మృతి చెందిన విషయం తెలియడంతో ఆయన అస్వస్థతకు గురై ఆస్పత్రిలో చేర్చినట్లు సమాచారం.
నారా లోకేశ్ సంతాపం
రోడ్డు ప్రమాదంలో నలుగురు మృతి చెందడం తనను తీవ్రంగా కలచివేసిందని విద్య, ఐటి శాఖల మంత్రి నారా లోకేశ్ పేర్కొన్నారు. మృతులకు నివాళులర్పిస్తూ, వారి కుటుంబ సభ్యులకు ప్రగాఢ సానుభూతి తెలిపారు.
కామెంట్‌లు (0)