- సిపిఎం రాష్ట్ర కార్యదర్శి వి శ్రీనివాసరావు
- 7వ రోజుకు చేరిన మహాధర్నా
ప్రజాశక్తి-అమరావతి బ్యూరో : రాష్ట్రవ్యాప్తంగా ఉన్న బిఆర్ అంబేద్కర్ గురుకుల విద్యాలయాల్లో పనిచేస్తున్న పార్ట్టైమ్ టీచర్లు, లెక్చరర్లు, సిబ్బందిని కాంట్రాక్ట్‌ విధానంలోకి మార్చి, రెగ్యులర్‌ చేయాలని సిపిఎం రాష్ట్ర కార్యదర్శి వి శ్రీనివాసరావు డిమాండ్‌ చేశారు. విజయవాడ ధర్నా చౌక్‌లో వీరు నిర్వహిస్తున్న మహా ధర్నా 7వ రోజుకు చేరగా, ఆదివారం మహాధర్నాను ఆయన ప్రారంభించారు. ఈ కార్యక్రమానికి కెవిపిఎస్‌ రాష్ట్ర ప్రధాన కార్యదర్శి అండ్ర మాల్యాద్రి అధ్యక్షత వహించారు. ఈ సందర్భంగా శ్రీనివాసరావు మాట్లాడుతూ.. ఈ విద్యా సంస్థల్లో ఒకే రకమైన పని చేస్తున్నప్పటికీ వీరిని రెగ్యులర్‌, కాంట్రాక్ట్‌, పార్ట్‌ టైమ్‌ అని మూడు రకాలుగా ఎందుకు చూడాలని ప్రశ్నించారు. పార్ట్టైమ్ ఉపాధ్యాయులు, అధ్యాపకులను కాంట్రాక్ట్‌‌కు మార్చడానికి ప్రభుత్వానికి అభ్యంతరం ఎందుకన్నారు. ఈ ప్రభుత్వానికి మానవత్వం లేదన్నారు. ప్రభుత్వం నెత్తికెత్తుకున్న సనాతన ధర్మంలో గురువులను గౌరవిస్తారని, ఈ ప్రభుత్వం మాత్రం గురువులను రోడ్డుపైకి తీసుకొచ్చిందన్నారు. 20 ఏళ్ల నుంచి సేవలందిస్తున్నా ఇప్పటికీ పార్ట్‌ టైమ్‌ ఉద్యోగులుగా ఉంచడం సరికాదన్నారు. ఒక్కసారి ఎమ్మెల్యేగా గెలిస్తే రూ.25 వేలు, రెండు సార్లు గెలిస్తే రూ.50 వేలు జీవితాంతం పింఛను పొందుతున్నారని చెప్పారు. ప్రజల కోసం త్యాగం చేయగలిగిన వారే పదవుల్లో ఉండాలన్నారు. తాత్కాలిక ఉపాధ్యాయులు, అధ్యాపకులకు సిపిఎం మద్దతును తెలియజేశారు. సమాజం మీకు అండగా ఉంటుందని, పోరాటం కొనసాగించాలని అన్నారు. వ్యవసాయ కార్మికసంఘం రాష్ట్ర కోశాధికారి ఆంజనేయులు మాట్లాడుతూ.. సమానపనికి సమాన వేతనం ఇవ్వాలని కోరడం న్యాయమైన డిమాండని, దీనిని పరిష్కరించాల్సిన బాధ్యత ప్రభుత్వంపై ఉందని అన్నారు. ఈ ఉద్యమానికి వ్యవసాయ కార్మిక సంఘం మద్దతు ఉంటుందన్నారు. అండ్ర మాల్యాద్రి మాట్లాడుతూ.. తాత్కాలిక ఉపాధ్యాయులు, అధ్యాపకుల విషయంలో ఎపి సాంఘిక సంక్షేమ గురుకుల విద్యా సంస్థల సొసైటీ వివక్ష చూపుతుందన్నారు. కాంట్రాక్ట్‌, రెగ్యులర్‌ ఉద్యోగులను చూస్తున్న విధంగా తాత్కాలిక ఉద్యోగులను చూడటం లేదన్నారు. జీతాలు ప్రతినెలా ఒకటో తేదీనే చెల్లించాలని, బకాయిలను వెంటనే అందజేయాలని అన్నారు. అతి తక్కువ జీతాలిచ్చి ఉదయం 4 నుంచి రాత్రి 10 గంటల వరకూ పని చేయించుకుంటున్నారని చెప్పారు. గత నెల 28వ తేదీన మహాధర్నా ప్రారంభించిన అనంతరం సొసైటీ కార్యదర్శి చర్చలకు పిలిచి కొన్ని సమస్యల పరిష్కారానికి హామీ ఇచ్చారన్నారు. కానీ ఇంతవరకూ ఎటువంటి చర్యలు తీసుకోలేదన్నారు. ఎస్‌ఎఫ్‌ఐ రాష్ట్ర కార్యదర్శి కె ప్రసన్నకుమార్‌ మహాధర్నాకు మద్దతు తెలిపి ప్రసంగించారు. ఈ సందర్భంగా మోకాళ్లపై నిలబడి నిరసన తెలిపారు. ఈ మహాధర్నాలో అసోసియేషన్‌ నాయకులు మున్నెల్లి గురురత్నం, మురగారెడ్డి, యేసోబు, ఇస్మాయేలు, జ్యోతి, చినబాబు తదితరులు పాల్గొన్నారు.
కామెంట్‌లు (0)