ఎఫ్‌బిఐ మోస్ట్‌ వాంటెడ్‌ జాబితాలో గోల్డీ బ్రార్‌

వాషింగ్టన్‌ : గ్యాంగ్‌స్టర్‌ సతీందర్‌జీత్‌ సింగ్‌ అలియాస్‌ గోల్డీ బ్రార్‌ను అమెరికా ఫెడరల్‌ బ్యూరో ఆఫ్‌ ఇన్వెస్టిగేషన్‌ (ఎఫ్‌బిఐ) తన పది మంది మోస్ట్‌ వాంటెడ్‌ పరారీలో ఉన్నవారి జాబితాలో చేర్చింది. ఆయన ఆచూకీ, అరెస్టుకు దారితీసే సమాచారం అందించిన వారికి 10 లక్షల అమెరికన్‌ డాలర్ల (సుమారు రూ.8.3 కోట్లు) రివార్డు ప్రకటించింది. ఈ మేరకు ఎఫ్‌బిఐ సోమవారం వెల్లడించింది. దక్షిణ కాలిఫోర్నియాతోపాటు అమెరికా, కెనడా ప్రాంతాల్లో పలు హింసాత్మక నేరాలకు పాల్పడుతున్నట్లు ఆరోపణలు ఎదుర్కొంటున్న లారెన్స్‌ బిష్ణోయ్‌ ఆర్గనైజ్డ్‌ క్రైమ్‌ గ్రూప్‌తో సతీందర్‌జీత్‌ సింగ్‌కు సంబంధాలు ఉన్నాయని ఎఫ్‌బిఐ పేర్కొంది. రాజకీయ, మతపరమైన ప్రముఖుల హత్యలు, కాల్పులు, హత్యలు, కిడ్నాప్‌లు, బలవంతపు వసూళ్లు, దాడులు, మాదకద్రవ్యాలు, ఆయుధాల అక్రమ రవాణా వంటి నేరాల్లో ఆయన ప్రమేయం ఉన్నట్లు ఆరోపించింది. సింగ్‌ వద్ద ఆయుధాలు ఉండే అవకాశం ఉందని, ఆయన ప్రమాదకర వ్యక్తి కావడంతోపాటు తప్పించుకునే అవకాశం కూడా ఉందని ఎఫ్‌బిఐ హెచ్చరించింది. ఉత్తర అమెరికాలో బిష్ణోయ్‌ సంస్థకు సింగ్‌ నాయకత్వం వహిస్తున్నట్లు దర్యాప్తు అధికారులు ఆరోపించారు. ప్రపంచవ్యాప్తంగా ఉన్న ఆ సంస్థ సభ్యులు, అనుచరులను సమన్వయం చేయడంలో ఆయన కీలక పాత్ర పోషించినట్లు పేర్కొన్నారు. సింగ్‌పై రాకెటీర్‌ ఇన్‌ఫ్లూయెన్స్డ్‌ అండ్‌ కరప్ట్‌ ఆర్గనైజేషన్స్‌ (ఆర్‌ఐసిఒ) కుట్ర, బెదిరింపుల ద్వారా వాణిజ్యాన్ని అడ్డుకునేందుకు కుట్ర, ఆ ప్రయత్నానికి పాల్పడటం, నియంత్రిత మాదక పదార్థాలను పంపిణీ చేయడం, పంపిణీ ఉద్దేశంతో వాటిని కలిగి ఉండేందుకు కుట్ర వంటి అభియోగాలు నమోదయ్యాయి. ఈ కేసులో కాలిఫోర్నియాలోని సెంట్రల్‌ డిస్ట్రిక్ట్‌ యుఎస్‌ డిస్ట్రిక్ట్‌ కోర్టు జూలై 1న ఆయనపై ఫెడరల్‌ అరెస్ట్‌ వారెంట్‌ జారీ చేసింది. భారత్‌ కేంద్రంగా పనిచేస్తున్న అంతర్జాతీయ వ్యవస్థీకృత నేర ముఠాలపై అమెరికా అధికారులు నిర్వహించిన ‘ఆపరేషన్‌ హార్డ్‌బాల్‌’ దర్యాప్తులో సింగ్‌ పేరు వెలుగులోకి వచ్చింది. జూలైలో ఇలాంటి మూడు నేర సంస్థలతో సంబంధం ఉన్న 37 మంది నిందితులపై అమెరికా అధికారులు అభియోగాలు నమోదు చేశారు. వాటిలో ఒక అభియోగపత్రం బిష్ణోయ్‌ సంస్థకు సంబంధించినదని, అందులో సింగ్‌ను ఆ సంస్థ నాయకుల్లో ఒకరిగా పేర్కొన్నట్లు ఎఫ్‌బిఐ తెలిపింది.