రాజమండ్రి : సుదీర్ఘ నిరీక్షణ తర్వాత గోదావరి నదికి ఎట్టకేలకు భారీగా వరద నీరు వచ్చి చేరుతోంది. ఎగువన ఉన్న క్యాచ్మెంట్ ప్రాంతాలలో విస్తారంగా కురుస్తున్న వర్షాల కారణంగా వరద ఉధృతి క్రమంగా పెరుగుతోంది. ఈ వరద ప్రవాహంతో ఆంధ్రప్రదేశ్లోని అల్లూరి సీతారామరాజు జిల్లా దేవీపట్నం మండలం వద్ద గోదావరి నది మునుపెన్నడూ లేని విధంగా సరికొత్త రూపాన్ని సంతరించుకుంది. ఎగువ నుండి వస్తున్న కొత్త నీరు, ఇక్కడి పాత నీటితో కలవడం వల్ల నది నీలి, ఎరుపు రంగుల కలయికతో సరికొత్తగా కనిపిస్తోంది. ఈ విలక్షణమైన దృశ్యాన్ని చూడటానికి పర్యాటకులు, స్థానికులు నదీ తీరానికి భారీగా తరలివస్తున్నారు. అయితే, వరద ఉధృతి పెరుగుతుండటంతో గండిపోచమ్మ ఆలయ పరిసరాల్లోకి ఇప్పటికే వరద నీరు వచ్చి చేరింది.
ధవళేశ్వరం బ్యారేజీకి వరద ...
ఎగువ ప్రాంతాల నుండి వస్తున్న వరద ప్రవాహం నేరుగా దిగువకు చేరుతుండటంతో, తూర్పుగోదావరి జిల్లా రాజమండ్రి వద్ద ఉన్న సర్ ఆర్థర్ కాటన్ (ధవళేశ్వరం) బ్యారేజీకి నీటి తాకిడి భారీగా పెరిగింది. బ్యారేజీ వద్ద నీటిమట్టం గంటగంటకూ పెరుగుతుండటంతో అధికారులు అప్రమత్తమయ్యారు. వరద పరిస్థితిని నిరంతరం పర్యవేక్షిస్తూ, వచ్చిన నీటిని వచ్చినట్లే సముద్రంలోకి విడుదల చేయడానికి వీలుగా బ్యారేజీ క్రస్ట్ గేట్లను ఎత్తివేస్తున్నారు. లంక గ్రామాల ప్రజలను, నదీ తీర ప్రాంత వాసులను ముందస్తుగా హెచ్చరిస్తూ అప్రమత్తంగా ఉండాలని సూచించారు. గోదావరికి ఈ సీజన్లో ఇదే మొదటి భారీ వరద కావడంతో ఒకవైపు కరవు తీరుతుందనే ఆనందం వ్యక్తమవుతున్నప్పటికీ, మరోవైపు లోతట్టు ప్రాంతాలు జలమయం కాకుండా అధికారులు ముందస్తు భద్రతా చర్యలను ముమ్మరం చేశారు.
కామెంట్లు (0)