బిజినెస్ : దేశీయ స్టాక్‌ మార్కెట్లు సోమవారం భారీ లాభాలతో దూసుకెళ్లాయి. ఇరాన్‌ యుద్ధానికి ముగింపు పలికేందుకు చర్చలు జరుగుతున్నాయన్న వార్తలతో అంతర్జాతీయంగా ముడి చమురు ధరలు తగ్గాయి. దీంతో మదుపర్లలో విశ్వాసం పెరిగి మార్కెట్లలో కొనుగోళ్ల జోరు కనిపించింది. ఈ క్రమంలో ఒక దశలో బీఎస్‌ఈ సెన్సెక్స్‌ 1,000 పాయింట్లకు పైగా లాభపడింది.
ఉదయం 10 గంటల సమయానికి సెన్సెక్స్‌ 943 పాయింట్లు పెరిగి 75,388 వద్ద కొనసాగింది. ఎన్‌ఎస్‌ఈ నిఫ్టీ 257 పాయింట్లు లాభపడి 23,305 వద్ద ట్రేడయింది. నిఫ్టీలో రిలయన్స్‌, మ్యాక్స్‌ హెల్త్‌కేర్‌, టాటా స్టీల్‌, జియో ఫైనాన్షియల్‌, ఎన్‌టీపీసీ షేర్లు లాభాలు నమోదు చేయగా, సన్‌ ఫార్మా, అపోలో హాస్పిటల్స్‌, ఐషర్‌ మోటార్స్‌, అదానీ పోర్ట్స్‌, ట్రెంట్‌ షేర్లు నష్టాల్లో కొనసాగాయి. డాలర్‌తో పోలిస్తే రూపాయి మారకం విలువ 94.97 వద్ద ప్రారంభమైంది.
మార్కెట్ల ర్యాలీకి రిలయన్స్‌ ఇండస్ట్రీస్‌ ప్రకటించిన మెరుగైన త్రైమాసిక ఫలితాలు కూడా తోడయ్యాయి. సెప్టెంబరు త్రైమాసికంలో కంపెనీ రూ.29,550 కోట్ల రికార్డు నికర లాభాన్ని ప్రకటించింది. దీంతో రిలయన్స్‌ షేరు విలువ 6 శాతానికి పైగా పెరిగింది. ఇతర కంపెనీల నుంచి వచ్చిన సానుకూల ఫలితాలు కూడా సూచీల పెరుగుదలకు దోహదపడ్డాయి.
మరోవైపు గత వారం బ్యారెల్‌ ముడి చమురు ధర 118 డాలర్ల ఆరు నెలల గరిష్ఠానికి చేరగా, తాజాగా బ్రెంట్‌ క్రూడ్‌ ధర 110 డాలర్ల దిగువకు పడిపోయింది. అంతర్జాతీయ పరిణామాలు, చమురు ధరల తగ్గుదల దేశీయ మార్కెట్లకు కలిసొచ్చాయి.
కామెంట్‌లు (0)