ఫలించిన ఆదివాసీ పోరాటం - మారికవలస ఎస్ఓఈ కొనసాగింపుకు నిర్ణయం

మారికవలస ఎస్ఓఈ కొనసాగింపుకు నిర్ణయం..

దిగివచ్చిన ప్రభుత్వం..

ఫలించిన ఆదివాసీ సంఘాల పోరాటం....

ప్రజాశక్తి-పాడేరు (అల్లూరి సీతారామరాజు జిల్లా) : విశాఖపట్నంలోని మారికవలస లోనే యధావిధిగా గురుకులం బాయ్స్ ఇంగ్లీష్ మీడియం రెసిడెన్షియల్ స్కూల్ (స్కూల్ ఆఫ్ ఎక్స్ లెన్స్) (ఎస్ ఓ ఈ) కొనసాగించేందుకు శుక్రవారం అర్ధరాత్రి దాటిన సమయంలో ప్రభుత్వం ఎట్టకేలకు నిర్ణయం తీసుకుంది. ఈ పాఠశాలలో చదువుతున్న విద్యార్థులను వేర్వేరు పాఠశాలలకు తరలించి పూర్తిగా ఈ పాఠశాలను మూసివేసే ప్రక్రియను ఇటీవల ప్రభుత్వం దాదాపుగా పూర్తి చేసింది. దీంతో గత 3 రోజుల నుండి ఈ పాఠశాల కొనసాగింపు కోసం పట్టుబట్టి ఐ టి డి ఏ గేటు వద్ద రాత్రి పగలు బైఠాయింపుతో ఆదివాసి ప్రజా సంఘాలు ఉధృతంగా సాగించిన పోరాటం ఫలించింది. గోచిల ప్రదర్శన, పోలీసులతో ధర్నా శిబిరం తొలగింపు, ఆదివాసీ సంఘాల నేతలు అప్పలనరస, ధర్మన్నపడాల్, రాధాకృష్ణ ల అరెస్టుల పర్వంతో తీవ్ర ఉద్రిక్తల నడుమ ప్రజా పోరాటం సిద్ధించింది.

ఈ మేరకు అర్ధరాత్రి దాటిన తర్వాత ఐటిడిఎ ప్రాజెక్టు అధికారి ఆదిత్య వర్మతో పాటు జిల్లా ఎస్పీ ధర్నా శిబిరం వద్దకు వచ్చి ఈ గురుకుల రెసిడెన్షియల్ పాఠశాలను యధావిధిగా కొనసాగించేందుకు ప్రభుత్వం నిర్ణయించిందని ప్రకటించారు. దీంతో మారికవలస ఎస్ఓఈ పేరెంట్స్ కమిటీ ఆధ్వర్యంలో అక్కడే ఆందోళన చేస్తున్న విద్యార్థులు వారి తల్లిదండ్రులు హర్షం వ్యక్తం చేశారు. అనంతరం ఆదివాసి అధికార్ రాష్ట్రీయ మంచి జాతీయ కార్యవర్గ సభ్యులు అప్పల నరస జండా ఊపి విద్యార్థుల బస్సులను పాఠశాలలకు తరలించారు...

జిఒ 3 కి చట్టబద్ధతపై ఉత్తర్వులు ఇవ్వాలి

నేడు అరకు పర్యటనలో సిఎం చంద్రబాబు స్పష్టతతో ప్రకటన చేయాలి......

జిఒ నెంబర్ 3 కు ప్రత్యేక చట్టబద్ధత కల్పిస్తూ వెంటనే ఉత్తర్వులు ఇవ్వాలని, 1/ 70 చట్టం రక్షణకు సుప్రీం కోర్టులో కౌంటర్ పిటిషన్ దాఖలు చేయాలని ఆదివాసి అధికార రాష్ట్రీయ మంచ్ జాతీయ కార్యవర్గ సభ్యులు పి.అప్పలనరస ప్రభుత్వాన్ని డిమాండ్ చేశారు. అల్లూరి ఏజెన్సీలో ఆదివాసి ప్రజా సంఘాలు ఈ డిమాండ్లతో గత కొన్నేళ్లుగా చేస్తున్న ఆందోళన పై రాష్ట్ర ముఖ్యమంత్రి చంద్రబాబు స్పందించాలని నేడు అరకు లోయ పర్యటనకు వస్తున్న సందర్భంగా ... ప్రకటన చేసి ఆదివాసి ప్రజలకు నిరుద్యోగ యువతకు స్పష్టత ఇవ్వాలని, అక్టోబర్ నెలలో ప్రభుత్వం నిర్వహించే డీఎస్సీలో

100 శాతం ఉద్యోగ రిజర్వేషన్ ఆదివాసి యువతకు కల్పించడంపై ఈ పర్యటనలో ముఖ్యమంత్రి చంద్రబాబు ప్రకటన చేయాలని ఆయన డిమాండ్ చేశారు.