శీతాకాలంలో పచ్చళ్లు, పొడులు, జామ్‌ల రూపంలో ఉసిరికాయలను ఎక్కువగా వినియోగిస్తుంటారు. పోషకాల గనిగా, చాలామంది వీటిని సూపర్‌ఫుడ్‌గా భావిస్తారు. ఇందులో విటమిన్ సి పుష్కలంగా ఉండటం వల్ల రోగనిరోధక శక్తిని పెంచడానికి, చర్మ ఆరోగ్యానికి ఇది ఎంతగానో ఉపయోగపడుతుంది. అయితే ఉసిరికాయలు కొంతమంది ఆరోగ్యానికి సరిపడవు. ముఖ్యంగా కొన్ని రకాల ఆరోగ్య సమస్యలు ఉన్నవారు వీటిని తీసుకునేటప్పుడు జాగ్రత్తలు తీసుకోవాలని వైద్య నిపుణులు చెబుతున్నారు.
ఉసిరికాయలలో విటమిన్ సి అత్యధిక సాంద్రతలో ఉంటుంది. శరీరం అధిక మొత్తంలో విటమిన్ సిని జీర్ణం చేసుకున్నప్పుడు, ఆ అదనపు విటమిన్ సిని ‘ఆక్సలేట్లు’గా మారుస్తుంది. సాధారణంగా కిడ్నీలలో ఏర్పడే రాళ్లలో ‘కాల్షియం ఆక్సలేట్’ రాళ్లు అత్యంత ముఖ్యమైనవి. కిడ్నీ రాళ్ల సమస్యతో బాధపడుతున్న వారు ఉసిరికాయలను ఎక్కువ మోతాదులో తీసుకుంటే మూత్రంలో ఆక్సలేట్ల గాఢత గణనీయంగా పెరుగుతుంది. రాళ్లు వేగంగా ఏర్పడే ప్రమాదం ఉంటుంది.
ఉసిరికాయలో సహజంగానే ఆమ్ల గుణం, సేంద్రీయ ఆమ్లాలు చాలా ఎక్కువగా ఉంటాయి. తీవ్రమైన యాసిడ్ రిఫ్లక్స్, గ్యాస్ట్రోఎసోఫేజియల్ రిఫ్లక్స్ డిసీజ్, దీర్ఘకాలిక గుండెల్లో మంట లేదా కడుపులో క్రియాశీల పెప్టిక్ అల్సర్లతో బాధపడుతున్న వారు పచ్చి ఉసిరికాయలు లేదా వాటి రసాన్ని నేరుగా తీసుకోకూడదు.
కామెంట్‌లు (0)