ఓస్లో: హైదరాబాద్‌లో జరగనున్న మీడియా సదస్సులో పాల్గొనేందుకు భారత్‌కు బయలుదేరిన నార్వేజియన్ జర్నలిస్ట్ హెల్లె లింగ్ స్వెండ్‌సెన్‌కు (Helle Ling Svendsen) చివరి నిమిషంలో వీసా రద్దయినట్లు ఆమె వెల్లడించారు. ఓస్లో కేంద్రంగా పనిచేస్తున్న 'డాగ్సావిసెన్' (Dagsavisen) పత్రికలో ఆమె జర్నలిస్టుగా పనిచేస్తున్నారు. విమానాశ్రయానికి బయలుదేరే ముందు వీసాను రద్దు చేసినట్లు అధికారులు సమాచారం ఇచ్చారని ఆమె తెలిపారు.
2026 మే నెలలో ప్రధాని నరేంద్ర మోడీ ఓస్లో పర్యటన సందర్భంగా జరిగిన సంయుక్త విలేకరుల సమావేశంలో హెల్లె లింగ్ అడిగిన ప్రశ్నలకు ప్రధాని సమాధానం ఇవ్వకుండా వెళ్లిపోయారు. ఈ వీడియో అప్పట్లో ప్రపంచవ్యాప్తంగా చర్చనీయాంశమైంది. మోడీ ప్రభుత్వాన్ని, ప్రముఖ భారతీయ పారిశ్రామికవేత్తలను విమర్శిస్తూ ఆమె గతంలో పలు కథనాలు రాశారు. ఆ కథనాల్లోని విమర్శలే చివరి నిమిషంలో వీసా నిరాకరణకు కారణమై ఉండవచ్చని ఆమె అనుమానం వ్యక్తం చేశారు.
నవంబర్ 13, 14 తేదీల్లో హైదరాబాద్‌లో కాంగ్రెస్ పార్టీ నిర్వహిస్తున్న 'భారత్ సమ్మిట్'లో 'మీడియా భవిష్యత్తు మరియు పత్రికా స్వేచ్ఛ' అనే అంశంపై ప్రసంగించేందుకు ఆమె భారత్‌కు రావాల్సి ఉంది. ఈ సదస్సులో 70కి పైగా దేశాల ప్రతినిధులు పాల్గొంటున్నారు.
మొదటిసారి భారత్‌కు వచ్చేందుకు సిద్ధమై, విమానాశ్రయానికి బయలుదేరడానికి సరిగ్గా 10 నిమిషాల ముందు ఓస్లోలోని భారత రాయబార కార్యాలయం నుండి ఫోన్ వచ్చిందని, తన వీసా రద్దయినందున ప్రయాణించలేరని చెప్పారని ఆమె 'ఎక్స్' (X) వేదికగా విడుదల చేసిన వీడియోలో పేర్కొన్నారు. ఈ విషయంలో కేంద్ర హోంమంత్రి అమిత్ షా జోక్యం చేసుకుని, తనకు భారత్ వచ్చేందుకు అనుమతి ఇవ్వాలని ఆ వీడియో ద్వారా విజ్ఞప్తి చేశారు. అయితే, హెల్లె లింగ్ విజ్ఞప్తిపై కేంద్ర హోంశాఖ గానీ, విదేశాంగ శాఖ గానీ, భారత రాయబార కార్యాలయం గానీ ఇప్పటివరకు అధికారికంగా స్పందించలేదు.
సమాధానం దాటవేసిన ప్రధాని.. గతంలో ఏం జరిగింది?
మే నెలలో రెండు రోజుల అధికారిక పర్యటన నిమిత్తం ప్రధాని మోడీ ఓస్లో వెళ్లారు. నార్వే ప్రధాని జోనాస్ గహర్ స్టోర్‌తో కలిసి నిర్వహించిన సంయుక్త విలేకరుల సమావేశం ముగించుకుని వెళ్తున్న మోడీని మీడియా ప్రతినిధులు ప్రశ్నించగా, ఆయన సమాధానం చెప్పకుండా వేగంగా అక్కడి నుండి వెళ్లిపోయారు. మీడియా ప్రశ్నలకు ఎందుకు సమాధానం ఇవ్వడం లేదని హెల్లె లింగ్ గట్టిగా ప్రశ్నించినప్పటికీ ఆయన స్పందించలేదు. "మేము మిమ్మల్ని ఎందుకు నమ్మాలి? దేశంలో జరుగుతున్న మానవ హక్కుల ఉల్లంఘనలను అరికట్టేందుకు ప్రయత్నిస్తారా?" అని ఆమె ప్రశ్నించారు.
2014లో అధికారంలోకి వచ్చినప్పటి నుండి ప్రధాని మోడీ సాంప్రదాయ పద్ధతిలో ఒంటరిగా విలేకరుల సమావేశాలు నిర్వహించలేదు. విదేశీ పర్యటనల్లోనూ ఆయన మీడియా ప్రశ్నలకు అరుదుగానే సమాధానమిస్తుంటారు. కేవలం ముందస్తుగా నిర్ణయించిన ప్రశ్నలు, సమాధానాలతో కూడిన ఇంటర్వ్యూలలో మాత్రమే ఆయన పాల్గొంటున్నారు.
ఓస్లో ఘటన తర్వాత హెల్లె లింగ్‌పై సోషల్ మీడియాలో తీవ్రస్థాయిలో సైబర్ దాడులు, ట్రోలింగ్ జరిగాయి. అంతర్జాతీయ స్థాయిలో భారత్ ప్రతిష్ఠను దెబ్బతీయడానికి ప్రయత్నిస్తున్న "విదేశీ గూఢచారి" అంటూ కొన్ని సంఘ్ పరివార్ అనుకూల ఖాతాలు ఆమెను విమర్శించాయి.
గత నెలలో 'రిపోర్టర్స్ వితౌట్ బోర్డర్స్' విడుదల చేసిన వార్షిక ప్రపంచ పత్రికా స్వేచ్ఛ సూచీలో 180 దేశాలకు గాను భారత్ 157వ స్థానంలో నిలిచింది. గత కొన్నేళ్లుగా ఈ జాబితాలో నార్వే మొదటి స్థానంలో కొనసాగుతోంది. గతంలో మోడీ నెదర్లాండ్స్ పర్యటన సమయంలోనూ ఇద్దరు డచ్ జర్నలిస్టులు ప్రశ్నలు అడగగా, ఆయన నేరుగా సమాధానం ఇవ్వకుండా దాటవేశారు.
కామెంట్‌లు (0)