ప్రేమ, స్నేహం, పెళ్లి పేరుతో పరిచయాలు పెంచుకుని నమ్మకం సంపాదించడం.. ఆ తర్వాత డబ్బు గుంజడం, వ్యక్తిగత సమాచారాన్ని దుర్వినియోగం చేయడం, ప్రైవేట్‌ ఫొటోలు, వీడియోలతో బెదిరించడం.. ఆన్‌లైన్‌ మోసగాళ్లు అనుసరిస్తున్న పద్ధతులివి. ప్రతి పరిచయమూ మోసపూరితమైనది కాకపోయినా, అవతలి వ్యక్తి నిజమైన వివరాలు తెలియని పరిస్థితుల్లో గుడ్డిగా నమ్మడం ప్రమాదకరం.
మోసగాళ్లు మొదట ఆప్యాయంగా మాట్లాడుతూ, తమ కుటుంబం, ఉద్యోగం, ఆర్థిక స్థితి గురించి నమ్మకం కలిగించే కథలు చెబుతారు. కొద్దిరోజుల్లోనే ప్రేమను ప్రకటించి, భవిష్యత్తుపై హామీలిస్తారు. ఆ తర్వాత అనారోగ్యం, ప్రమాదం, అత్యవసర ప్రయాణం వంటి కారణాలతో డబ్బు అడుగుతారు. మరికొందరు అధిక లాభాల ఆశ చూపి నకిలీ ట్రేడింగ్‌ యాప్‌లలో పెట్టుబడులు పెట్టిస్తారు. మొదట లాభాలు వచ్చినట్లు చూపించి, పెద్ద మొత్తాలు జమయ్యాక డబ్బు ఉపసంహరణను నిలిపివేస్తారు. ఇతరుల ఫొటోలతో నకిలీ ఖాతాలు సృష్టించడం, ఉద్యోగం, కుటుంబ నేపథ్యం గురించి తప్పుడు వివరాలు ఇవ్వడం కూడా మోసగాళ్ల పద్ధతులే.
మోసపు సంకేతాలివే...
- పరిచయమైన కొద్ది రోజుల్లోనే ప్రేమను ప్రకటించడం, పెళ్లి హామీలివ్వడం.
- వ్యక్తిగత వివరాలు, ఇంటి చిరునామా, కుటుంబ సమాచారం తెలుసుకోవడానికి తొందరపడటం.
- ప్రైవేట్‌ ఫొటోలు, వీడియోలు పంపాలని లేదా వీడియో కాల్‌లో అభ్యంతరకరంగా ప్రవర్తించాలని ఒత్తిడి చేయడం.
- అనారోగ్యం, ప్రమాదం, అత్యవసర పరిస్థితుల పేరుతో డబ్బు అడగడం.
- తక్కువ సమయంలో అధిక లాభాలు వస్తాయని చెప్పి పెట్టుబడులకు ప్రోత్సహించడం.
- బ్యాంకు వివరాలు, పాస్‌వర్డ్‌లు, ఓటీపీ, యూపీఐ పిన్‌ అడగడం.
- గుర్తుతెలియని లింకులు తెరవాలని, ఫైళ్లు డౌన్‌లోడ్‌ చేయాలని లేదా యాప్‌లు ఇన్‌స్టాల్‌ చేయాలని చెప్పడం.
- ఉద్యోగం, నివాసం, కుటుంబ నేపథ్యం గురించి పరస్పర విరుద్ధమైన వివరాలు ఇవ్వడం.
- పరిచయాన్ని రహస్యంగా ఉంచాలని, కుటుంబ సభ్యులు లేదా స్నేహితులతో చెప్పవద్దని ఒత్తిడి చేయడం.
- వెంటనే నిర్ణయం తీసుకోవాలని తొందరపెట్టడం, ప్రశ్నిస్తే కోపగించడం లేదా భావోద్వేగాలతో బ్లాక్‌మెయిల్‌ చేయడం.
- వ్యక్తిగత ఫొటోలు, చాటింగ్‌ వివరాలను బయటపెడతానని బెదిరించి డబ్బు డిమాండ్‌ చేయడం.
ఈ సంకేతాల్లో ఏవైనా కనిపిస్తే అప్రమత్తంగా ఉండాలి. ఒక్క సంకేతంతోనే మోసమని నిర్ధారించలేకపోయినా, అనుమానాస్పద పరిస్థితుల్లో డబ్బు లేదా వ్యక్తిగత సమాచారాన్ని పంచుకోకూడదు.
భద్రతకు జాగ్రత్తలు
ఇంటి చిరునామా, కార్యాలయం, రోజువారీ ప్రయాణ వివరాలు, కుటుంబ సమాచారం వంటి వ్యక్తిగత విషయాలను అపరిచితులతో పంచుకోకూడదు. ప్రైవేట్‌ ఫొటోలు, వీడియోలు పంపడం మానుకోవాలి. ప్రొఫైల్‌ ఫొటోలను మాత్రమే నమ్మకుండా, అవతలి వ్యక్తి చెప్పే వివరాలను స్వతంత్రంగా ధ్రువీకరించాలి. డబ్బు అడిగితే వెంటనే పంపకుండా, పెట్టుబడుల ప్రతిపాదనలను విశ్వసనీయమైన మార్గాల్లో పరిశీలించాలి. తెలియని లింకులు, ఫైళ్లు, యాప్‌లకు దూరంగా ఉండాలి.
చాటింగ్‌ లేదా వీడియో కాల్‌ ద్వారా పొందిన చిత్రాలను మార్ఫింగ్‌ చేసి బెదిరించడం, వాటిని కుటుంబ సభ్యులకు పంపుతామని చెప్పి డబ్బు వసూలు చేయడం వంటి సైబర్‌ నేరాలూ జరుగుతున్నాయి. ఇలాంటి బెదిరింపులకు భయపడి డబ్బు చెల్లిస్తే మరిన్ని డిమాండ్లు ఎదురయ్యే అవకాశం ఉంది.
మోసపోతే.. వెంటనే ఫిర్యాదు
డబ్బు మోసం జరిగితే వెంటనే 1930 సైబర్‌ క్రైమ్‌ హెల్ప్‌లైన్‌కు ఫోన్‌ చేయాలి. cybercrime.gov.in పోర్టల్‌లో ఫిర్యాదు చేయడంతోపాటు బ్యాంకుకు సమాచారం ఇవ్వాలి. చాటింగ్‌ వివరాలు, ప్రొఫైల్‌ లింకులు, ఫోన్‌ నంబర్లు, లావాదేవీల రసీదులు, బెదిరింపు సందేశాలను ఆధారాలుగా భద్రపరచాలి. ప్రైవేట్‌ చిత్రాలతో బెదిరింపులు ఎదురైతే పోలీసులను సంప్రదించాలి. డబ్బు తిరిగి ఇప్పిస్తామని చెప్పి మరింత డబ్బు అడిగే వ్యక్తులను నమ్మకూడదు.
ఆన్‌లైన్‌ పరిచయాల్లో అప్రమత్తతే రక్షణ. ప్రేమ, స్నేహం పేరుతో వచ్చే ప్రతి మాటనూ నిజమని నమ్మకుండా, వ్యక్తిగత సమాచారం, ఆర్థిక వివరాలు, ప్రైవేట్‌ చిత్రాల విషయంలో జాగ్రత్తగా వ్యవహరించాలి. అనుమానం వచ్చినప్పుడు దూరంగా ఉండి నిజానిజాలను పరిశీలించడమే సురక్షితం.
కామెంట్‌లు (0)