ఆస్కార్ అవార్డు విజేత, హాలీవుడ్ నటి ఇవా మేరీ సెయింట్ కన్నుమూత

లాస్ ఏంజెల్స్: హాలీవుడ్ క్లాసిక్ చిత్రాలతో ప్రపంచవ్యాప్తంగా గుర్తింపు పొందిన ప్రముఖ నటి, ఆస్కార్ అవార్డు విజేత ఇవా మేరీ సెయింట్(102) కన్నుమూశారు. లాస్ ఏంజెల్స్‌లోని తన నివాసంలో మంగళవారం తుదిశ్వాస విడిచినట్లు కుటుంబ సభ్యులు తెలిపారు. 1954లో విడుదలైన ‘ఆన్ ద వాటర్‌ఫ్రంట్’ చిత్రంతో సినీ రంగ ప్రవేశం చేసిన ఇవా మేరీ సెయింట్.. తొలి చిత్రంతోనే ఉత్తమ సహాయ నటిగా ఆస్కార్ అవార్డును అందుకున్నారు. ఈ సినిమాలో మార్లన్ బ్రాండో సరసన నటించి ప్రేక్షకులను ఆకట్టుకున్నారు. ఆమె నటనకు విమర్శకుల ప్రశంసలు కూడా దక్కాయి.

1959లో ప్రముఖ దర్శకుడు ఆల్ఫ్రెడ్ హిచ్‌కాక్ తెరకెక్కించిన ‘నార్త్ బై నార్త్‌వెస్ట్’ ఆమె కెరీర్‌లో మరో ముఖ్యమైన చిత్రంగా నిలిచింది. క్యారీ గ్రాంట్ సరసన నటించిన ఈ సినిమాలో ఆమె పోషించిన పాత్రకు మంచి గుర్తింపు వచ్చింది. అనంతరం ‘ఎక్సోడస్’, ‘ఆల్ ఫాల్ డౌన్’, ‘గ్రాండ్ ప్రీ’, ‘సూపర్‌మ్యాన్ రిటర్న్స్’ వంటి పలు చిత్రాల్లో నటించారు.

వెండితెరతో పాటు టెలివిజన్‌లోనూ ఆమె తన ప్రతిభను చాటుకున్నారు. 1990లో వచ్చిన ‘పీపుల్ లైక్ అస్’ టెలివిజన్ సిరీస్‌లో నటనకు ఎమ్మీ అవార్డును అందుకున్నారు. 2006లో విడుదలైన ‘సూపర్‌మ్యాన్ రిటర్న్స్’ చిత్రంలో సూపర్‌మ్యాన్ దత్తత తల్లి మార్తా కెంట్ పాత్రలో కనిపించారు. 1924 జూలై 4న అమెరికాలోని న్యూజెర్సీలో జన్మించిన ఇవా మేరీ సెయింట్.. థియేటర్, టెలివిజన్, సినిమా రంగాల్లో ఏడు దశాబ్దాలకు పైగా కొనసాగారు. ఆస్కార్, ఎమ్మీ వంటి ప్రతిష్ఠాత్మక అవార్డులతో పాటు హాలీవుడ్‌లో తనదైన ప్రత్యేక గుర్తింపును సంపాదించుకున్నారు. 102 ఏళ్ల వయసులో ఆమె కన్నుమూయడంతో హాలీవుడ్ స్వర్ణయుగానికి చెందిన మరో దిగ్గజ నటి శకం ముగిసింది. తన అద్భుతమైన నటనతో తరతరాల ప్రేక్షకుల జ్ఞాపకాల్లో నిలిచిపోయిన ఇవా మేరీ సెయింట్‌కు సినీ ప్రపంచం ఘన నివాళి అర్పిస్తోంది.