Print Editionనా పాత్రతోనే సినిమా గుర్తుండాలి

తన సినిమాల్లోని పాత్రలు ప్రత్యేకంగా ఉండేలా కథలను ఎంచుకుంటానని హీరోయిన్‌ అనుపమ పరమేశ్వరన్‌ అన్నారు. దర్శకుడు బద్రప్ప రూపొందించిన ‘క్రేజీ కళ్యాణం’లో ఆమె కీర్తి పాత్రలో నటించారు. దసరా కానుకగా ఈ నెల 16న సినిమా విడుదల కానున్న నేపథ్యంలో అనుపమ మీడియాతో మాట్లాడారు. ‘‘నా సినిమాలన్నీ ఒకేలా ఉన్నాయని ప్రేక్షకులు అనుకోకూడదు. నా పాత్రను చూసి సినిమా పేరును గుర్తుపట్టేలా ఉండాలి. ‘క్రేజీ కళ్యాణం’లో కీర్తి పాత్ర కూడా ప్రేక్షకులకు గుర్తుండిపోతుంది’’ అని చెప్పారు. మొదట ఈ సినిమాకు మరో పేరు అనుకున్నామని, చిత్రీకరణ సమయంలో అంతా క్రేజీగా అనిపించడంతో ‘క్రేజీ కళ్యాణం’గా మార్చామని తెలిపారు. ఇది వినోదం, భావోద్వేగాలు కలగలిసిన కథ అని, నరేశ్‌, అఖిల్‌, తరుణ్‌ భాస్కర్‌ వంటి నటులు చేరడంతో మరింత ఆసక్తికరంగా మారిందని చెప్పారు. ‘‘ఈ సినిమాలో కీర్తికి పెళ్లవుతుందా లేదా అనేది తెరపై చూడాలి. మా ఇంట్లో మాత్రం నా పెళ్లి విషయంలో ఎలాంటి ఒత్తిడీ లేదు. నాకు నచ్చినప్పుడే పెళ్లి చేసుకోమని మా వాళ్లు చెప్పారు. ఈ కథ విన్నప్పుడు కొన్ని సన్నివేశాలకు నవ్వొచ్చింది, మరికొన్నింటికి భావోద్వేగానికి గురయ్యాను’’ అని అనుపమ వివరించారు.