న్యాయ విద్యార్థుల ప్రవర్తనను నియంత్రించే అధికారం బిసిఐ, రాష్ట్ర బార్ కౌన్సిల్స్‌కు లేదు: సుప్రీంకోర్టు

న్యూఢిల్లీ: న్యాయ విద్యార్థుల ప్రవర్తనను నియంత్రించే చట్టబద్ధమైన అధికారం బార్ కౌన్సిల్ ఆఫ్ ఇండియా (BCI)కి, రాష్ట్ర బార్ కౌన్సిల్స్‌కు లేదని సుప్రీంకోర్టు గురువారం స్పష్టం చేసింది. విద్యార్థులపై ఎలాంటి క్రమశిక్షణా చర్యలైనా వారి సొంత విద్యాసంస్థల నిబంధనల ప్రకారమే ఆయా సంస్థలే తీసుకోవాలని తేల్చిచెప్పింది.
హైదరాబాద్‌లోని 'నల్సార్' (NALSAR) న్యాయ విశ్వవిద్యాలయ స్నాతకోత్సవానికి భారత ప్రధాన న్యాయమూర్తి హాజరుకావడంపై ఆందోళన తెలిపిన విద్యార్థులపై బిసిఐ చర్యలు తీసుకోవడం ద్వారా రేగిన వివాదంపై విచారణ జరిపిన ప్రధాన న్యాయమూర్తి జస్టిస్ సూర్య కాంత్, జస్టిస్ జోయ్‌మాల్య బాగ్చీ, జస్టిస్ వి. మోహనలతో కూడిన ధర్మాసనం ఈ ఉత్తర్వులను జారీ చేసింది.
"అడ్వకేట్స్ యాక్ట్, 1961 ప్రకారం ఏర్పడిన బిసిఐకి కానీ, లేదా ఏ రాష్ట్ర బార్ కౌన్సిల్‌కు కానీ న్యాయ విద్యార్థులపై క్రమశిక్షణా చర్యలు తీసుకునే ప్రత్యక్ష లేదా పరోక్ష చట్టబద్ధమైన అధికారాలు లేవని మేము భావిస్తున్నాము. ఒక లా గ్రాడ్యుయేట్ అడ్వకేట్‌గా నమోదు (రిజిస్ట్రేషన్) చేసుకున్న తర్వాత మాత్రమే అలాంటి అధికారాలు వర్తిస్తాయి. విద్యార్థుల విషయానికొస్తే, వారిపై క్రమశిక్షణా చర్యలు తీసుకునే అర్హత వారి మాతృ సంస్థకు లేదా ఆ సంస్థ బైలాస్/నిబంధనల ప్రకారం నిర్దేశించిన ప్రాధికార సంస్థకు మాత్రమే ఉంటుంది" అని ధర్మాసనం తన ఉత్తర్వుల్లో పేర్కొంది.
నల్సార్ వివాదానికి సంబంధించి BCI జారీ చేసిన రెండు నోటిఫికేషన్లను కోర్టు రద్దు చేసింది. తీవ్ర విమర్శలు రావడంతో BCI వాటిని జారీ చేసిన కొద్ది గంటల్లోనే వెనక్కి తీసుకున్నప్పటికీ, సాంకేతికంగా వాటిని సుప్రీంకోర్టు కొట్టివేసింది.
"ఆగస్టు 13 నాటి ఆదేశాలు మరియు తదనంతర సవరించిన సమాచారాలన్నీ చట్టబద్ధమైన అధికారం లేనివిగా ప్రకటిస్తున్నాం. మధ్యంతర ఉత్తర్వులను ఖరారు చేస్తున్నాం" అని పేర్కొంటూ నల్సార్ పూర్వ విద్యార్థులు మిహిర సూద్, అభిషేక్ తివారీ దాఖలు చేసిన పిటిషన్‌ను ధర్మాసనం ముగించింది.
నల్సార్ విద్యార్థులను ప్రస్తుతానికి అడ్వకేట్లుగా నమోదు చేయకూడదని, ఈ వ్యవహారంపై విచారణ జరపాలని బిసిఐ ఛైర్మన్ మనన్ కుమార్ మిశ్రా ఆగస్టు 13న ఇచ్చిన ఆదేశాలను వారు సవాలు చేశారు. అయితే తీవ్ర ప్రజావ్యతిరేకత రావడంతో బిసిఐ ఛైర్మన్ ఆ ఆదేశాలను జారీ చేసిన కొద్ది గంటల్లోనే ఉపసంహరించుకున్నారు.
విచారణ సందర్భంగా లా విద్యార్థుల తరఫున హాజరైన సీనియర్ అడ్వకేట్ కె. పరమేశ్వర్ వాదిస్తూ... బిసిఐ ఛైర్మన్ ఆదేశాలను వెనక్కి తీసుకున్నప్పటికీ, అవి ఏ విధంగా జారీ అయ్యాయనే దానిపై విచారణ జరగాల్సిన అవసరం ఉందన్నారు. ఆ మేరకు పిటిషన్ ఇంకా ఉనికిలోనే ఉందన్నారు. "ఇది విశ్వవిద్యాలయంలో వాక్‌ స్వాతంత్ర్యం, భావ ప్రకటన స్వేచ్ఛకు సంబంధించిన అంశం. ఇది ఒక విద్యార్థికి మాత్రమే పరిమితం కాదు. మొత్తం విశ్వవిద్యాలయం వ్యాప్తంగా భావప్రకటనా స్వేచ్ఛను నిషేధించడం వంటిది" అని ఆయన పేర్కొన్నారు.
దీనిపై సీనియర్ అడ్వకేట్, బిసిఐ ఛైర్మన్ మిశ్రా స్పందిస్తూ... లేఖలను జారీ చేసిన గంట వ్యవధిలోనే ఉపసంహరించుకున్నామని, ఇప్పుడు ఈ అంశాన్ని ఇక్కడితో ముగించాలని కోరారు.
దీనికి పరమేశ్వర్ కౌంటర్ ఇస్తూ, "ఏ పరిస్థితుల్లో ఈ ఉత్తర్వులు వచ్చాయి, దీనిపై సమావేశాలు జరిగాయా లేదా అనేది తెలుసుకోవాలనుకుంటున్నాం. ఏది ఏమైనా ఇది న్యాయ విద్యను, న్యాయవాద వృత్తిని నియంత్రించే ఒక చట్టబద్ధమైన సంస్థ" అని అన్నారు.
బిసిఐ స్పందిస్తూ, "అంతా ఇప్పటికే ముగిసింది. కౌన్సిల్ సమావేశంలో ఈ విషయాన్ని పరిష్కరించినట్లు, ఇకపై ఏమీ లేదని స్పష్టం చేశాం. ఆ లేఖను వెంటనే ఉపసంహరించుకున్నాం" అని తెలిపారు.
దీనిపై సీజేఐ స్పందిస్తూ... "బిసిఐకి పరిధి లేదు... ఒక వ్యక్తి చదువు పూర్తి చేసిన తర్వాత, లా గ్రాడ్యుయేట్‌గా అడ్వకేట్‌గా నమోదు చేసుకున్నాకే వారి ప్రవర్తనను నియంత్రించే చట్టబద్ధమైన అధికారం బిసిఐకి ఉంటుంది. విద్యార్థులపై కాదు" అని స్పష్టం చేశారు.
సిజెఐ సూర్య కాంత్ విశ్వవిద్యాలయ పర్యటనకు వ్యతిరేకంగా ప్రచారం చేశారనే ఆరోపణల నేపథ్యంలో... తదుపరి ఉత్తర్వులు ఇచ్చే వరకు నల్సార్ 2026 గ్రాడ్యుయేట్లను అడ్వకేట్లుగా నమోదు చేయవద్దని ఆగస్టు 14న రాష్ట్ర బార్ కౌన్సిళ్లను బిసిఐ ఆదేశించడంతో ఈ వివాదం చెలరేగింది.
ఈ విషయం అంతకుముందు సుప్రీంకోర్టు దృష్టికి వచ్చినప్పుడు, సిజెఐ బిసిఐ జోక్యాన్ని తీవ్రంగా తప్పుబట్టారు. "ఇది విద్యార్థులకు, నాకు మధ్య జరుగుతున్న సంభాషణ. జోక్యం చేసుకోవడానికి వారు (బిసిఐ) ఎవరు? ఇది సరికాదు" అని సిజెఐ వ్యాఖ్యానించారు.