అమెరికన్‌ కార్పోరేట్‌ కంపెనీలకు లాభం చేకూర్చేందుకే యుపిఐ ఛార్జీలు : గౌరవ్‌ గొగోయ్‌

న్యూఢిల్లీ : అమెరికన్‌ కార్పోరేట్‌ సంస్థలకు లాభం చేకూర్చేందుకే యుపిఐ లావాదేవీలపై కేంద్రం ఛార్జీలను విధించిందని కాంగ్రెస్‌ ఎంపి గౌరవ్‌ గొగోయ్‌ గురవారం పేర్కొన్నారు. ఈ ఛార్జీలను వెనక్కి తీసుకోవాలని ఆయన డిమాండ్‌ చేశారు. ఈ అంశంపై పార్లమెంటు ఆర్థిక వ్యవహారాల స్టాండింగ్‌ కమిటీ ఈ అంశంపై చర్చ జరపలేదని అన్నారు. ఆర్థిక కమిటీ సభ్యులతో సమావేశమైనపుడు ఎండిఆర్‌ ఛార్జీలకు సంబంధించి ఆర్థికశాఖ ఎటువంటి నిర్దిష్ట ప్రతిపాదన చేయలేదని గొగోయ్‌ ఎక్స్‌ పోస్ట్‌లో పేర్కొన్నారు. యుపిఐ ఛార్జీల ఆవశ్యకతపై ప్రభుత్వ ప్రతినిధులు ఎటువంటి ‘‘స్పష్టమైన , సంతృప్తికరమైన ’’ సమాధానాలు ఇవ్వలేదని అన్నారు. ఈ ఛార్జీలు అమెరికన్‌ కార్పోరేట్‌ కంపెనీలకు మేలు చేకూర్చేందుకేనని మండిపడ్డారు. ఈ పన్నులు దేశంలోని చిన్న వ్యాపారులు, విక్రేతలు, పారిశ్రామికవేత్తలకు నష్టం కలిగిస్తాయని ఆందోళన వ్యక్తం చేశారు. పార్లమెంటరీ ఆర్థిక స్థాయి సంఘం చైర్మన్‌ భర్తృహరి మాట్లాడుతూ..సమావేశంలో కొందరు ఎంపిలు ఈ అంశాన్ని లేవనెత్తారని, అయితే కమిటీ తదుపరి సమావేశంలో చర్చకు తీసుకునే అవకాశం ఉందని తెలిపిందని అన్నారు. రూ.2,000కంటే ఎక్కువ విలువైన యుపిఐ లావాదేవీలపై కేంద్ర ప్రభుత్వం 0.4శాతం మర్చంట్‌ డిస్కౌంట్‌ రేట్‌ (ఎండిఆర్‌) ఛార్జీలను విధించిన సంగతి తెలిసిందే.