విడాకుల కేసులో బిడ్డకు డీఎన్‌ఏ పరీక్షకు సుప్రీంకోర్టు అనుమతి

న్యూఢిల్లీ: వైవాహిక వివాదంలో బిడ్డ పితృత్వంపై భర్తకు బలమైన అనుమానాలు ఉంటే, విడాకుల కేసులో వాస్తవాలను నిర్ధారించేందుకు డీఎన్‌ఏ లేదా పితృత్వ పరీక్ష నిర్వహించవచ్చునని సుప్రీంకోర్టు బుధవారం స్పష్టం చేసింది. జస్టిస్ ఎంఎం సుందరేశ్, జస్టిస్ ప్రసన్న బి. వరలేలతో కూడిన ధర్మాసనం పితృత్వ పరీక్షను వ్యతిరేకిస్తూ మహిళ దాఖలు చేసిన పిటిషన్‌ను కొట్టివేసింది. పూణే ఫ్యామిలీ కోర్టు, బాంబే హైకోర్టు ఆదేశాలను సమర్థిస్తూ, ఈ కేసు వాస్తవాల నేపథ్యంలో డీఎన్‌ఏ పరీక్షకు అనుమతించింది. తన భార్యపై అనుమానాలున్న భర్త, బిడ్డ తనకు పుట్టలేదని పేర్కొంటూ విడాకులు కోరుతున్న సందర్భంలో పితృత్వాన్ని నిర్ధారించేందుకు పరీక్ష అవసరమని కోర్టు పరిగణించింది. డీఎన్‌ఏ పరీక్షకు ఎవరినీ బలవంతం చేయలేరని, పరీక్ష లేకుండానే తన విడాకుల పిటిషన్‌ను విచారించాలని మహిళ తరఫు వాదనను సుప్రీంకోర్టు అంగీకరించలేదు. ఈ కేసులో భర్త ఇప్పటికే హైదరాబాద్‌లోని ఒక ప్రయోగశాలలో స్వయంగా డీఎన్‌ఏ పరీక్ష చేయించుకున్నాడు. ఆ పరీక్ష ఫలితాల ప్రకారం, తాను ఆ బిడ్డకు తండ్రి అయ్యే అవకాశం సున్నా శాతంగా ఉందని నివేదిక వెల్లడించింది. ఆ నివేదికను ఆధారంగా చేసుకుని కోర్టు ఆధ్వర్యంలో అధికారిక డీఎన్‌ఏ పరీక్ష నిర్వహించాలని భర్త కోరాడు. ప్రాథమికంగా తన వాదనకు మద్దతుగా ఇప్పటికే ఉన్న డీఎన్‌ఏ పరీక్ష ఫలితం సరిపోతుందని ఢిల్లీ హైకోర్టు పేర్కొంది. సుప్రీంకోర్టు ఈ ఉత్తర్వును సమర్థించింది.