ఇపిఎఫ్‌ఒ వేతన పరిమితి పెంపుకు కేబినెట్‌ ఆమోదం : అశ్వినీ వైష్ణవ్‌

న్యూఢిల్లీ : ఎంప్లాయిస్‌ ప్రావిడెంట్‌ ఫండ్‌ ఆర్గనైజేషన్‌ (ఇపిఎఫ్‌ఒ) వేతన పరిమితిని నెలకు రూ.25,000కు పెంచేందుకు కేబినెట్‌ ఆమోదించినట్లు కేంద్రమంత్రి అశ్వినీవైష్ణవ్‌ బుధవారం తెలిపారు. గతంలో రూ.15,000గా ఉండే వేతన పరిమితిని రూ.25,000కు పెంచేందుకు కేంద్ర మంత్రివర్గం ఆమోదం తెలిపిందని అన్నారు. ఈ నిర్ణయంతో అదనంగా 51 లక్ష‍ల మందికి పైగా ఉద్యోగులు తప్పనిసరి ఇపిఎఫ్‌ఒ పరిధిలోకి వస్తారని తెలిపారు. ఈ నిర్ణయం ప్రావిడెంట్ ఫండ్ పొదుపులు, ఎంప్లాయీస్ పెన్షన్ స్కీమ్ (ఇపిఎస్‌) కింద పెన్షన్ భద్రత, ఎంప్లాయీస్ డిపాజిట్ లింక్డ్ ఇన్సూరెన్స్ స్కీమ్ (ఇడిఎల్‌ఐ) కింద బీమా రక్షణను పొందే అవకాశాలను కూడా విస్తృతం చేస్తుందని పేర్కొన్నారు. ప్రస్తుతం ఉన్న సుమారు ₹10,250 కోట్ల వార్షిక బడ్జెట్ మద్దతుతో పోలిస్తే, ప్రభుత్వానికి అదనంగా రూ.11,339 కోట్ల వార్షిక వ్యయం అవుతుందని అన్నారు. కొత్త వేతన పరిమితి ప్రకారం, ఇపిఎస్‌కు ఉద్యోగులు, యజమానులు వేసే చందాలు కూడా పెరుగుతాయి.