ప్రజాశక్తి -గన్నవరం : యూట్యూబర్, జర్నలిస్ట్ రావణ్ అరెస్టు పూర్తిగా అప్రజాస్వామికమని, ఇది రాజకీయ కక్షసాధింపు చర్యల్లో భాగమేనని ప్రముఖ న్యాయవాది జడ శ్రావణ్ కుమార్ తీవ్రంగా ఖండించారు. కృష్ణా జిల్లా గన్నవరంలో నిర్వహించిన విలేకరుల సమావేశంలో ఆయన మాట్లాడారు. రావణ్ను దేశద్రోహిగా ముద్రించి, కావాలనే తప్పుడు కేసుల్లో ఇరికించారని ఆయన ఆరోపించారు.
మరణశిక్ష పడే సెక్షన్లా? బాధ్యత మీదే!
యువతను మావోయిస్టులు, టెర్రరిస్టులుగా మారమని ప్రలోభపెట్టేలా వీడియోలు అప్లోడ్ చేశారనే నెపంతో రావణ్పై అత్యంత కఠినమైన సెక్షన్లు నమోదు చేయడంపై శ్రావణ్ కుమార్ మండిపడ్డారు. "రావణ్ను కనీసం రెండేళ్ల పాటు జైల్లోనే ఉంచాలనే కుట్రతో, మరణశిక్ష పడే స్థాయి సెక్షన్లను నమోదు చేయడం చాలా బాధాకరం. ఇప్పటివరకు నాలుగు పోలీస్ స్టేషన్లలో కేసులు పెట్టినప్పుడు గుర్తుకు రాని ఈ సెక్షన్లు ఇప్పుడే ఎలా గుర్తొచ్చాయి?" అని ఆయన ప్రశ్నించారు. ఈ సందర్భంగా డిప్యూటీ సీఎం పవన్ కళ్యాణ్ను ఉద్దేశించి మాట్లాడుతూ.. "సమాజంలో ప్రశ్నించే హక్కు లేదా? పవన్ కళ్యాణ్ గారూ.. ఇది మీకు కరెక్టేనా?" అని నిలదీశారు. పవన్ కళ్యాణ్కు ఇచ్చిన 100% పవర్ (స్ట్రైక్)ను చాలా అద్భుతంగా వాడుతున్నారంటూ ఎద్దేవా చేశారు. ఈ కేసులో రిమాండ్ తర్వాత ప్రభుత్వం చేయబోయే అప్రజాస్వామిక చర్యలకు 2029 ఎన్నికల్లో ప్రజలు ఏ విధంగా సమాధానం చెబుతారో కాలమే నిర్ణయిస్తుందని, దానికి మీరే పూర్తి బాధ్యత వహించాల్సి ఉంటుందని హెచ్చరించారు.
చట్టబద్ధమైన పోరాటానికి సిద్ధం
ఒక యూట్యూబర్ను, జర్నలిస్ట్ను ప్రశ్నించే విధానంలో తారతమ్యాలు ఉండవచ్చని.. అయితే బ్యానర్ ఆర్గనైజేషన్ యువకులను ప్రలోభపెట్టిందనే సాకుతో ఇలాంటి కేసులు పెట్టడం సమంజసం కాదన్నారు.
నిబంధనల ఉల్లంఘన: రావణ్ అరెస్ట్ సమయంలో అధికారులు ఎలాంటి చట్టబద్ధమైన విధివిధానాలు పాటించలేదని, ఇది పౌర హక్కుల ఉల్లంఘన కిందకే వస్తుందని స్పష్టం చేశారు.
కోర్టులో వాదనలు: రావణ్ను ఎన్ని నెలలు జైల్లో ఉంచుతారో చూస్తామని, ఈరోజే న్యాయమూర్తి ముందు బాధితుడి తరపున గట్టిగా వాదనలు వినిపించడానికి తాను సిద్ధంగా ఉన్నానని ప్రకటించారు.
ప్రశ్నించే గొంతులను అణచివేసే ప్రయత్నాలను సమాజం, మీడియా గమనిస్తోందని.. ప్రజాస్వామ్యంలో ప్రతి ఒక్కరికీ తమ అభిప్రాయాలను స్వేచ్ఛగా వ్యక్తం చేసే హక్కు ఉందనే విషయాన్ని గుర్తుంచుకోవాలన్నారు. రావణ్ అరెస్టుపై చట్టపరంగా పూర్తి స్థాయిలో పోరాడతామని, బాధితుడికి అన్ని విధాలా అండగా ఉంటామని జడ శ్రావణ్ కుమార్ స్పష్టం చేశారు.
కామెంట్లు (0)