బియ్యంతో ఆహార పదార్థాలు వండుకోవడం అందరికీ తెలిసిందే. అయితే ఇంటి నిర్వహణలో ఎదురయ్యే పలు క్లిష్టమైన సమస్యలను తేలికగా పరిష్కరించడానికి కూడా ఇవి అద్భుతంగా తోడ్పడతాయి. బియ్యంలో ఉండే సహజమైన తేమను పీల్చుకునే శక్తి, రుద్దే నైజం (స్క్రబ్బింగ్) వల్ల ఖరీదైన క్లీనింగ్ ప్రొడక్ట్స్తో పనిలేకుండా పోతుంది. ఆ ఉపయోగాలు ఏంటంటే..
ఇరుకైన గాజు పూల కుండీలు, బాటిళ్ల శుభ్రత..
చిన్న మూతి ఉన్న గాజు సీసాలు, ఫ్లాస్క్లు లేదా డిజైన్ వాజులను లోపలి వరకు చెయ్యి పెట్టి తుడవడం చాలా కష్టం. ఇలాంటి వాటిలో రెండు మూడు చెంచాల బియ్యం తవుడు లేదా పచ్చి బియ్యం వేసి, గోరువెచ్చటి సబ్బు నీటిని కలపాలి. మూత గట్టిగా పెట్టి సీసాను బాగా ఊపితే (షేక్ చేస్తే), బియ్యం గింజలు నాచురల్ స్క్రబ్లా పనిచేసి లోపల పేరుకుపోయిన నూనె మరకలను, మొండి మురికిని వదిలిస్తాయి. ఆ తర్వాత మంచి నీళ్లతో కడిగితే సీసా కొత్తదానిలా మెరుస్తుంది.
నీటిలో తడిసిన ఫోన్లు, ఎలక్ట్రానిక్ వస్తువుల పునరుద్ధరణ..
మొబైల్ ఫోన్ లేదా రిమోట్ అనుకోకుండా నీటిలో పడితే వెంటనే దాన్ని స్విచ్ ఆఫ్ చేసి, పొడి బియ్యం ఉన్న పాత్రలో పూర్తిగా మునిగేలా పెట్టాలి. బియ్యం అందులోని తేమను క్రమంగా పీల్చుకుంటుంది. 48 గంటల పాటు అలాగే ఉంచిన తర్వాత బయటకు తీసి ఆన్ చేయవచ్చు. అయితే పరికరం లోపలికి నీరు ఎక్కువగా చేరితే మాత్రం సర్వీస్ సెంటర్కు తీసుకెళ్లాలి.
టెడ్డీ బేర్లు, సాఫ్ట్ టాయ్స్ డ్రై క్లీనింగ్..
పిల్లలు ఆడుకునే సాఫ్ట్ టాయ్స్ను నీటితో ఉతికితే వాటి మెత్తదనం తగ్గి, రంగు వెలిసిపోతుంది. వీటిని డ్రై క్లీన్ చేయడానికి ఒక పెద్ద ప్లాస్టిక్ సంచిలో బొమ్మను ఉంచి, అందులో ఒకటి రెండు కప్పుల బియ్యం వేసి మూత గట్టిగా కట్టాలి. కొద్దిసేపు ఆ సంచిని మెల్లగా ఊపడం వల్ల బొమ్మపై ఉండే దుమ్ము, మురికిని బియ్యం పీల్చుకుంటాయి. తర్వాత బొమ్మను బయటకు తీసి మెత్తటి బ్రష్తో దులిపితే సరిపోతుంది.
వర్షాకాలంలో ఉప్పు తడవకుండా..
తేమ వాతావరణం వల్ల ఉప్పు డబ్బాలో ముద్దలుగా మారడం సహజం. దీన్ని నివారించడానికి ఉప్పు పాత్రలో కొన్ని బియ్యపు గింజలను వేసి ఉంచాలి. ఇవి గాలిలోని అధిక తేమను పీల్చుకుని, ఉప్పు ఎప్పుడూ పొడిగా, విడివిడిగా ఉండేలా చూస్తాయి.
మిక్సీ బ్లేడ్లు, కాఫీ గ్రైండర్ల వాసనలు మాయం..
మిక్సీ లేదా కాఫీ గ్రైండర్ బ్లేడ్లకు పట్టిన జిడ్డును తొలగించడానికి ఒక కప్పు బియ్యాన్ని అందులో వేసి అర నిమిషం పాటు గ్రైండ్ చేయాలి. ఈ ప్రక్రియ వల్ల బ్లేడ్లపై ఉన్న జిడ్డు, బ్యాడ్ స్మెల్ మాయమవుతాయి. అనంతరం పాత్రను నీళ్లతో శుభ్రం చేసుకుంటే సరిపోతుంది.
మొక్కలకు బలవర్ధకమైన పోషణ
బియ్యం కడిగిన నీటిని పారబోయకుండా మొక్కల మొదళ్లలో పోయడం వల్ల అందులోని పిండిపదార్థాలు, పోషకాలు నేల సారవంతాన్ని పెంచి మొక్కలు బలంగా పెరిగేందుకు దోహదపడతాయి. అయితే ఈ నీటిలో ఉప్పు లేదా నూనె కలవకుండా జాగ్రత్తపడాలి. అలాగే మితిమీరి పోయకూడదు.
సైన్స్ ఏం చెబుతోంది?
బియ్యం గింజలకు ఉండే హైగ్రోస్కోపిక్ లక్షణం వల్ల అవి పరిసరాల్లోని తేమను గ్రహించగలవు. ఆహార శాస్త్ర పరిశోధనల ప్రకారం బియ్యంలోని పిండిపదార్థం (స్టార్చ్) నిర్మాణం వల్లే ఇవి నీటిని వేగంగా శోషించుకోగలుగుతాయి.
కామెంట్లు (0)