వీడ్కోలు సమావేశం

ఐదేళ్ల ఆఖరి మెట్టు మీద

సర్వసభ్య సమావేశం

సభ ఉద్దేశానికి సభికుల ఉద్వేగానికి

మధ్యనెక్కడో ముఖం చాటేసుకుంది

ఆత్మీయ ఆలింగనం!

​

అధికారుల చేతుల్లో కాయితాలూ ఫైళ్ల హడావిడి

ప్రతినిధుల కళ్లల్లో

కాలపరిమితి అప్పుడే ముగిసిందా అని నిర్వేదం!

​

పార్టీల పేరుతో గుద్దులాట ఉపన్యాసాలు

కండువాల రంగుల్ని బట్టీ కేకలూ నినాదాలు!

​

స్థాయీ సంఘాల వారీగా

అభివృద్ధి ఆనవాళ్లేమిటని చూస్తే

తాగి తాగి నీళ్లన్నీ ఒట్టబెట్టి

ఎండిపోయిన సముద్రంలో

నులుసుకుంటూ సొరచేపలు..

​

ఒక్కొక్క ప్రణాళిక

ఒక్కో నివేదికగా మారేసరికి

ఆఖరిముద్ద ఇంకా గొంతుదిగడంలేదని

నీళ్లు తాగుతూ గద్దలు..

ప్రాదేశిక నియోజకవర్గాల వార్షిక బడ్జెట్లవారీగా

తగులూ మిగులూ చూసేటప్పటికి

వ్రత నియమానికి లోబడ్డామని చెప్పి

కళ్లుమూసుకొని పాలు తాగుతూ పులులు..

​

నిధులూ గ్రాంట్ల లెక్క తేల్చి

ఆమోదించిన ఖర్చు చూడొద్దూ

పళ్లసందుల్లో పుల్ల గుచ్చుకుంటూ

తలుపుల్లేని బోను ముందు

ఆవలిస్తున్నాయి తోడేళ్లు..

​

చీమల పుట్టని ఆక్రమించి

పిపీలికాల ముందు పీపీలు ఊదుతూ

కునికిపాటు మేలుకొలుపులు

పాడుతున్నాయి పాములు..

​

మూడంచెల వ్యవస్థలో

అట్టడుగు వరకూ అదే వరస!

బ్యాలెట్ పండగ రోజున

భూమ్యాకాశాలు పట్టనంత సందడి తప్ప

ఎన్నిక మరునాటికే అంతా పాసి క్రతువు!

ఇంతా చూస్తే..

ఈ వీడ్కోలు సభలో కూడా

ప్రజలకు చెప్పేందుకు ఇంకేమీ లేనట్టేనా?

- కంచరాన భుజంగరావు

94415 89602