ఏదో లోపం

ఇంతా చేసి వంగ పువ్వు రంగులో

15 కాయితాలు

జాతిపిత నవ్వో వైపు

అలనాటి రాణి గారి బావి మరో వైపు

ఎటు చూసినా విలువొకటే

ఒకటి పక్కన రెండు సున్నాలు!

​

ఎండా వానా, రాత్రీపగలు

గడియారం ముళ్ళ మధ్య పరుగులెత్తి,

సొంత కష్టం కాయితమైతే,

ఏ పేరూ లేని అప్పుకి హామీ పత్రం!

​

వేళ్ళ సందున మళ్లీ మళ్లీ లెక్క పెడితే

అదో సంబరంలా ఉండేది!

ఏ ఒకటి ఖర్చు పెట్టాలన్నా

కష్టార్జితం కరిగిపోతుందని

మనసంతా గుబులేసేది!

​ఊదా రంగు రెపరెపల్లో ఇంకిన

మట్టి గంధం, కాయ కష్టం,

రక్త బంధం ఖర్చుకి కళ్ళెం వేసేది

​

మెల్లగా మారువేషాలు మొదలై,

చెయ్యి మారితే చాలు

చెమట చెమ్మేదో, మోసపు బుసలేదో తెలీని నోటుగా,

తలలు మార్చే ఓటయ్యింది

​రంగుల రాట్నమై

ప్రాణం పణం పెట్టే బలహీనతై

కొండా కోనా, గాలీ జాలిలా

డబ్బు కూడా మాయమై పోయింది!

క్యూఆర్ కోడ్‌లో పడి కొట్టుకుని,

అపరిచితుడి గొంతులో

వందిచ్చావ్, ధన్యవాదాలు అంటూ

విచిత్రంగా సెలవు తీసుకుంటోంది

లక్షలు గల్లంతైనా కాసుల్లా గలగలమనవు!

​

రూపాయి రాకాపోకా అర్థం కాక,

కరువు బరువై,

బేతాళుడి శవం రాజు భుజం మీద వాలినట్టు

తెలిసి జవాబు చెప్పలేక

తల వెయ్యి ముక్కలయే వ్యాపారంలో

జీవిత బీమా మీద కూడా పన్ను కట్టుకుంటోంది.

అసలేం జరుగుతోంది?

​- కాళ్ళకూరి శైలజ, 98854 01882