ప్రతిరోజూ 60 ఇళ్లకు వార్తాపత్రికలు
చెన్నై గోపాలపురం వీధుల్లో తెల్లవారుజామున 3.30 గంటలకే ఓ సైకిల్ పరుగులు తీస్తుంది. దానిపై పాలు, వార్తాపత్రికలు.. సైకిల్ తొక్కుతున్నది 94 ఏళ్ల కె. షణ్ముగసుందరం. స్థానికులకు ‘పేపర్ తాత’గా పరిచయమైన ఆయన రోజూ 50 పాల ప్యాకెట్లు, 60 ఇళ్లకు వార్తాపత్రికలు పంపిణీ చేస్తున్నారు. వర్షమైనా, ఎండైనా.. 2000వ దశకం నుంచి ఆయన దినచర్యలో మాత్రం విరామం లేదు.
షణ్ముగసుందరం తెల్లవారుజామున 3.30 గంటలకు నిద్రలేచి సైకిల్పై బయలుదేరుతారు. గోపాలపురంలోని ఓ కేంద్రం నుంచి సుమారు 50 పాల ప్యాకెట్లు తీసుకుని ఇళ్లకు పంపిణీ చేస్తారు. అనంతరం పద్మావతి రోడ్డు నుంచి ప్రారంభించి 8 వీధుల్లో సుమారు 60 ఇళ్లకు వార్తాపత్రికలు అందిస్తారు. వర్షం, ఎండతో సంబంధం లేకుండా 2000వ దశకం నుంచి ఈ పని కొనసాగిస్తున్నారు. జ్వరం వచ్చినా పేపర్లు పంపిణీ చేయడం ఆపలేదని ఆయన తెలిపారు.
తమిళ దినపత్రికలతో పాటు ఆంగ్ల పత్రికలను కూడా పంపిణీ చేసే ఆయన, ఆ తర్వాత ఓ వివాహ మండపం నిర్వహణ బాధ్యతలు చూస్తారు. మధ్యాహ్నం వరకు అక్కడ పత్రికలు చదువుతుంటారు. కరోనా సమయంలో పత్రికల పంపిణీ తగ్గింది. గతంలో 100 ఇళ్లకు పత్రికలు వెళ్లగా ప్రస్తుతం 60 ఇళ్లకు మాత్రమే అందుతున్నాయి. అయినా పని మానేయాలనే ఆలోచన లేదని షణ్ముగసుందరం చెప్పారు. ప్రజల మధ్య ఉండటమే తనకు ఇష్టమని తెలిపారు. షణ్ముగసుందరానికి ఐదుగురు కుమార్తెలు, ఒక కుమారుడు ఉన్నారు. వివిధ పనులు చేస్తూ పిల్లలను చదివించారు. ప్రస్తుతం భార్యను చూసుకుంటున్నారు.
గతంలో నీటి క్యాన్లను కూడా ఇళ్లకు పంపిణీ చేసిన షణ్ముగసుందరం.. పత్రికలు పంపిణీ చేసే సమయంలో అప్పటి తమిళనాడు ముఖ్యమంత్రి ఎం. కరుణానిధి సహా పలువురు ప్రముఖులను కలిశారు.
పాత మద్రాస్ నగర జ్ఞాపకాలను గుర్తుచేసుకుంటూ.. తన ఆటోమొబైల్ వ్యాపార అనుభవాలను కూడా స్థానికులతో పంచుకుంటున్నారు. గోపాలపురం వాసులు ఆయనను ఎంతో అభిమానంతో చూస్తున్నారు. “ప్రతిరోజూ ఉదయం ఆయనను సైకిల్పై చూస్తే నాకు స్ఫూర్తి కలుగుతుంది. ఆయనను చూసిన వెంటనే నాలోని బద్ధకం పోతుంది” అని స్థానికుడు మోహన్ తెలిపారు.
94 ఏళ్ల వయసులోనూ సైకిల్పై తన పనిని కొనసాగిస్తున్న ‘పేపర్ తాత’ షణ్ముగసుందరం.. వయసు కేవలం సంఖ్య మాత్రమేనని తన జీవనశైలితో చాటుతున్నారు.
కామెంట్లు (0)