ఆసియా క్రీడలు–2026లో భారత షూటర్ల సత్తా
ఆసియా క్రీడలు–2026లో భారత షూటర్లు సత్తా చాటారు. పురుషుల 10 మీటర్ల ఎయిర్ రైఫిల్ టీమ్ ఈవెంట్లో భారత్ రజత పతకం సాధించింది. సోమవారం ఐచి ప్రిఫెక్చర్ జనరల్ షూటింగ్ గ్యాలరీలో జరిగిన పోటీలో హిమాంశు ధిల్లాన్, పార్థ్ మానే, రుద్రాంక్ష్ పాటిల్తో కూడిన భారత జట్టు 1890.1 పాయింట్లు సాధించి రెండో స్థానంలో నిలిచింది.
చైనాకు చెందిన షెంగ్ లిహావో, మా సిహాన్, ఝాంగ్ చాంగ్హాంగ్ జట్టు 1899.0 పాయింట్లతో స్వర్ణ పతకం సాధించింది. చైనా జట్టు సాధించిన ఈ స్కోరు క్వాలిఫికేషన్లో ప్రపంచ రికార్డుగా నమోదైంది.
టీమ్ ఈవెంట్లో రజతం సాధించిన భారత షూటర్లలో రుద్రాంక్ష్ పాటిల్, హిమాంశు ధిల్లాన్ వ్యక్తిగత విభాగంలోనూ ఫైనల్కు అర్హత సాధించారు. రుద్రాంక్ష్ 631.8 పాయింట్లతో మూడో స్థానంలో నిలవగా, ధిల్లాన్ 630.0 పాయింట్లతో ఏడో స్థానంలో నిలిచారు. పార్థ్ మానే 628.3 పాయింట్లతో పదో స్థానంలో నిలిచారు.
వ్యక్తిగత క్వాలిఫికేషన్లో చైనాకు చెందిన షెంగ్ లిహావో 635.4 పాయింట్లతో అగ్రస్థానంలో నిలిచాడు. మా సిహాన్ 633.0 పాయింట్లతో రెండో స్థానంలో ఉన్నాడు. మరో చైనా షూటర్ ఝాంగ్ చాంగ్హాంగ్ 630.6 పాయింట్లతో టాప్-8లో ఉన్నప్పటికీ ఫైనల్కు అర్హత సాధించలేకపోయాడు.
ఒక దేశం నుంచి గరిష్ఠంగా ఇద్దరు షూటర్లకు మాత్రమే వ్యక్తిగత ఫైనల్లో పాల్గొనే అవకాశం ఉండటంతో ఝాంగ్ చాంగ్హాంగ్కు చోటు దక్కలేదు. దీంతో భారత్కు చెందిన రుద్రాంక్ష్, ధిల్లాన్ వ్యక్తిగత ఫైనల్లో పతకం కోసం పోటీ పడనున్నారు.
కామెంట్లు (0)