కరువు రాకాసి (ఎల్ నినో)

ఒక మాయా వలయం

ప్రాంతాల్ని బంధించే దిశలో విస్తరిస్తోంది

కరువు రాకాసిగా జడలు విప్పుకుంటూ

వాతావరణాన్ని కబళించేందుకు

రెక్కలు కట్టుకుని బయలుదేరింది.

​

నీటి మేఘాలపై వత్తిడి పెంచుతూ

ఒక స్థిరత్వాన్ని చెదరగొట్టేందుకు

వేడి పవనంగా పరుగులతో వస్తోంది

అతివృష్టి అనావృష్టి వలయాకారంగా

భూమిపై వాలిపోడానికి సిద్ధమైంది.

​

సూపర్ ఎల్ నినో పేరును తగిలించుకుని వడగాల్పుల్ని వెదజల్లుతూ వస్తోంది

ఉపరితల ఉష్ణానికి ఆజ్యం పోస్తూనే

వర్షాభావ పరిస్థితికి అద్దం పడుతోంది

పాడి పంటలపై మంటను ఉసిగొల్పుతూ

నష్టాల కడలిలో ముంచడానికి వస్తోంది.

​

బీడువారిన భూమిలో పగుళ్ళను

మనసారా నిమరడానికి ఉవ్విళ్లూరుతోంది

ఆకలి కడుపుల రోదనలను

రాగాలాపంగా వినాలని ఆత్రుత పడుతోంది

మొలకలపై వత్తిడి పెంచుతూనే

చిగురును తుంచడానికి సంసిద్ధమైంది.

​

సూపర్ ఎల్ నినో పరివర్తనంలో

ఏ ప్రాంతం ఏ రంగును పులుముకుంటుందో

ఏ ఆవర్తనం ఎంత వరకు విస్తరిస్తుందో

మండే సూర్యగోళపు సెగల కిరణాలకు

రోకలి బండ పగిలే దీనావస్థ రాకముందే

జాగ్రత్తకు దగ్గరవుతూ జీవిద్దాం.

- నరెద్దుల రాజారెడ్డి

సెల్ : 9666016636