"అమెరికాలోనే 6 కోట్లకు పైగా వీక్షకులు.. ప్రపంచవ్యాప్తంగా 150 కోట్ల మంది చూసినట్లు అంచనా"
న్యూఢిల్లీ : ఫిఫా ప్రపంచకప్–2026 ఫైనల్ మ్యాచ్ వీక్షణలపరంగా కొత్త చరిత్ర సృష్టించింది. అమెరికా, మెక్సికో, కెనడా సంయుక్తంగా ఆతిథ్యం ఇచ్చిన ఈ మెగా టోర్నీలో స్పెయిన్ ఛాంపియన్గా నిలిచి ప్రపంచకప్ను కైవసం చేసుకుంది. తుది పోరులో అర్జెంటీనాపై ఆధిపత్యం చెలాయించి టైటిల్ను దక్కించుకుంది. దాదాపు ఆరు వారాల పాటు సాగిన ఈ టోర్నీ ఉత్కంఠభరిత పోరులతో ప్రపంచవ్యాప్తంగా ఫుట్బాల్ అభిమానులను అలరించింది. విజేతగా నిలిచిన స్పెయిన్కు సుమారు రూ.480 కోట్ల ప్రైజ్మనీ లభించింది. టోర్నీ మొత్తం ఆటగాళ్ల రవాణా ఏర్పాట్లు, నిర్వహణ తీరుపై వచ్చిన విమర్శలు, ఒక జట్టుకు అనుకూలంగా ఫిఫా వ్యవహరించిందన్న ఆరోపణలు వంటి పలు వివాదాలు చోటుచేసుకున్నప్పటికీ, అభిమానుల ఆసక్తి మాత్రం ఏమాత్రం తగ్గలేదు.
ఫైనల్లో స్పెయిన్–అర్జెంటీనా మధ్య జరిగిన మ్యాచ్ను అమెరికాలో ఫాక్స్ గ్రూప్ ఛానళ్ల ద్వారా సుమారు 3.89 కోట్ల మంది వీక్షించినట్లు సంస్థ వెల్లడించింది. మ్యాచ్ ఉత్కంఠభరితంగా సాగిన సమయంలో వీక్షకుల సంఖ్య 5.16 కోట్లకు చేరిందని పేర్కొంది. దీంతో అమెరికా చరిత్రలో ఇంగ్లిష్ భాషలో అత్యధిక మంది వీక్షించిన ఫుట్బాల్ మ్యాచ్గా ఇది నిలిచింది. అదే సమయంలో స్పానిష్ భాషా ప్రసార సంస్థ టెలెముండో ఛానళ్లలో మరో 2.26 కోట్ల మంది ఈ ఫైనల్ను వీక్షించినట్లు వెల్లడించింది. దీంతో అమెరికాలోనే మొత్తం 6 కోట్లకు పైగా ప్రేక్షకులు ఫైనల్ను వీక్షించినట్లు అంచనా వేస్తున్నారు. ప్రపంచవ్యాప్తంగా సుమారు 150 కోట్ల మంది ఈ మ్యాచ్ను వీక్షించినట్లు నిపుణులు భావిస్తున్నప్పటికీ, దీనిపై అధికారిక గణాంకాలు ఇంకా విడుదల కాలేదు.
ఆతిథ్య జట్లు నిష్క్రమించినా తగ్గని క్రేజ్ ....
ప్రపంచకప్కు ఆతిథ్యం ఇచ్చిన అమెరికా, మెక్సికో, కెనడా జట్లు నాకౌట్ దశలోనే టోర్నీ నుంచి నిష్క్రమించాయి. అయినప్పటికీ ఫుట్బాల్పై అభిమానుల ఆసక్తి తగ్గలేదు. లియోనెల్ మెస్సి, కిలియన్ ఎంబాపె, ఇర్లింగ్ హాలాండ్, క్రిస్టియానో రొనాల్డో వంటి స్టార్ ఆటగాళ్ల ఆటను చూసేందుకు అభిమానులు భారీ సంఖ్యలో టీవీలకు అతుక్కుపోయారు. యువ సంచలనం లామిన్ యమాల్ ప్రదర్శన కూడా ప్రత్యేక ఆకర్షణగా నిలిచింది. స్టేడియాల్లో టికెట్ ధరలు అధికంగా ఉండటంతో టెలివిజన్, డిజిటల్ వేదికల ద్వారా మ్యాచ్లను వీక్షించిన వారి సంఖ్య గణనీయంగా పెరిగింది. టోర్నీ విజయవంతంగా నిర్వహించేందుకు సహకరించిన అమెరికా, మెక్సికో, కెనడా దేశాలను ఫిఫా అధ్యక్షుడు గియాని ఇన్ఫాంటినో ప్రత్యేకంగా అభినందించారు. ఈ ప్రపంచకప్ నిర్వహణ, వీక్షకుల ఆదరణ, వాణిజ్యపరమైన విజయాలతో ఫిఫా చరిత్రలో మరో మైలురాయిగా నిలిచింది.
కామెంట్లు (0)