ఆకాశంలో మేఘాలు కమ్ముతున్నా, వర్షం ఎప్పుడు కురుస్తుందో కచ్చితంగా చెప్పలేని రోజుల్లో - మన పూర్వీకులు ఎలా వ్యవహరించేవారు? అప్పట్లో వాతావరణ శాఖ లేదు, మొబైల్ యాప్స్ లేవు. అయినా వారు వర్షం రాకను ముందుగానే ఊహించగలిగేవారు. అందులో రహస్యం ఏమిటంటే - ప్రకృతిని పరిశీలించడం. ముఖ్యంగా మొక్కలు, చెట్లు వర్షం రాకముందే కొన్ని ప్రత్యేకమైన సంకేతాలను ప్రదర్శిస్తాయి. వీటిని గమనించే రైతులు, గిరిజనులు, అటవీవాసులు తరతరాలుగా వర్షా గమనాన్ని అంచనా వేస్తున్నారు. మొక్కలు ఎలా వర్షాన్ని అంచనా వేస్తాయో, ఆ వెనుక ఉన్న శాస్త్రీయ కారణాలను అర్థం చేసుకుందాం.
మొక్కలు మనకు కనిపించనంత సున్నితంగా పర్యావరణ మార్పులను గ్రహించగలవు. అవి వాతావరణంలోని తేమ, గాలిపీడనం, ఉష్ణోగ్రతలో వచ్చే సూక్ష్మ మార్పులకు తక్షణమే స్పందిస్తాయి. వర్షం కురవడానికి కొన్ని గంటల ముందే ఇలాంటి మార్పులు సంభవిస్తాయి. మొక్కలు అంచనా వేస్తున్నాయి అనడం కంటే వర్షానికి ముందు వచ్చే పర్యావరణ సూచనలకు అవి స్పందిస్తున్నాయి అనడం సరైంది. ఈ స్పందనలను గమనించిన మన పూర్వీకులు వాటిని వర్ష సూచనలుగా మార్చుకున్నారు.
కొన్ని ఆసక్తికర సూచనలు..
పువ్వులు మూసుకుపోవడం..
వర్షం రాకముందు ఆకాశంలో తేమ పెరుగుతుంది. ఈ తేమకు ప్రతిస్పందనగా కొన్ని పువ్వులు తమ రేకులను మూసేస్తాయి. ఉదా: డాండెలైన్ మొక్క వర్షం సమీపిస్తున్నప్పుడు దీని పసుపు పువ్వులు మూసుకుపోతాయి. అలాగే తులిప్స్, క్రోకస్, డైసీలు కూడా వర్షం ముందు తమ రేకులను ముడిచేస్తాయి. ఇలా చేయడం వల్ల పుప్పొడి వర్షపు నీటికి తడిసి, పాడవకుండా కాపాడుకోవడం. ఇది మొక్కల స్వీయరక్షణ వ్యూహం.
ఆకులు మార్పు చెందడం..
మాపిల్ చెట్లు తేమ పెరిగినప్పుడు వీటి ఆకులు వంకర్లు తిరుగుతాయి లేదా వాలిపోతాయి. కాటన్వుడ్ ఆకులు వర్షానికి ముందు తమ లేత అడుగుభాగాన్ని బయటపెడతాయి. విల్లో ఆకులు వర్షం రాకముందు తెల్లబడతాయని ఒక నమ్మకం.
బారో మీటర్ బుష్..
దీన్ని "టెక్సాస్ సేజ్" అని కూడా పిలుస్తారు. ఈ మొక్క వర్షానికి ముందు పువ్వులు పూస్తుందని నమ్మకం. అధిక తేమ లేదా తక్కువ గాలిపీడనం దీని పుష్పించడానికి కారణం కావచ్చు.
రెయిన్ ట్రీ- ‘‘వర్షపు చెట్టు..
దీని ఆకులు వర్షానికి ముందు మూసుకుపోతాయి. ఆకుల కాండంలోని ప్రత్యేక కణాలు (పుల్వినస్) తేమను గ్రహించి, ఆకుల కదలికను నియంత్రిస్తాయి.
పైన్ కోన్..
పైన్ చెట్టు కాయలు వర్షం రాకముందు మూసుకుపోతాయి.. వాతావరణం పొడిగా ఉన్నప్పుడు తెరుచుకుంటాయి.
నైట్-ఫ్లవరింగ్ జాస్మిన్..
త్రిపుర రాష్ట్రంలోని గిరిజనులు ఈ మొక్క పుష్పించే విధానాన్ని బట్టి వర్షాన్ని అంచనా వేస్తారు. శాస్త్రీయ అధ్యయనాలు కూడా ఇది స్వల్పకాలిక, దీర్ఘకాలిక వర్షపాతాన్ని సూచించడంలో మంచి సూచిక అని నిర్ధారించాయి.
ఇండియన్ మాలో- అబుటిలాన్ ఇండికమ్..
ఈ మొక్కలో అసాధారణంగా పుష్పించడం.. వర్షం రాకను సూచిస్తుందని టిబెట్ ప్రాంతంలో గమనించారు.
గోల్డెన్ షవర్ ట్రీ..
కేరళలో విషు పండగ సమయానికి ఈ చెట్టు పువ్వులు పూస్తాయి. వీటి పుష్పించే విధానం వర్షాకాలం సమీపిస్తున్నట్లు సూచిస్తుందని రైతుల నమ్మకం. ఈ చెట్టు వర్షాకాలం ప్రారంభానికి 45 రోజుల ముందు పసుపు పువ్వులతో నిండిపోతుందని పరిశోధనలు చెబుతున్నాయి.
ఇలా ఎందుకు జరుగుతుంది?ఈ మొక్కల ప్రవర్తన వెనుక కొన్ని శాస్త్రీయ కారణాలున్నాయి.
తేమ (Humidity) పట్ల సున్నితత్వం
వర్షానికి ముందు గాలిలో తేమ పెరుగుతుంది. మొక్కల ఆకులు, పువ్వులు ఈ తేమను గ్రహిస్తాయి. దీనివల్ల ఆకుల్లోని నీటి పీడనం మారుతుంది - దీంతో ఆకులు కదులుతాయి, వాలిపోతాయి లేదా మూసుకుపోతాయి.
గాలిపీడనం (Atmospheric Pressure) మార్పులు
వర్షం రాకముందు గాలిపీడనం తగ్గుతుంది. ఈ మార్పును కొన్ని మొక్కలు గ్రహించగలవు. ఉదాహరణకు, నెయిల్ వెంట (Rain Lily - Zephyranthes) తక్కువ పీడనం వల్ల దాని పుష్పించే హార్మోన్లు ప్రేరేపించబడి, వర్షానికి ముందే పువ్వులు పూస్తాయి.
వినడం - ధ్వని తరంగాలకు స్పందన
MIT (మసాచుసెట్స్ ఇనిస్టిట్యూట్ ఆఫ్ టెక్నాలజీ) పరిశోధకులు మొక్కలు వర్షపు ధ్వనిని విని స్పందిస్తాయని కనుగొన్నారు. వర్షపు చినుకుల ధ్వని వినగానే వరి విత్తనాలు 40% వరకు వేగంగా మొలకెత్తుతాయని శాస్త్రవేత్తలు గమనించారు.
పెట్రికోర్ (Petrichor) - వర్షం వాసన
వర్షం కురవడానికి ముందే మట్టి నుంచి ఒక ప్రత్యేకమైన సువాసన వస్తుంది. దీన్ని 'పెట్రికోర్' అంటారు. ఇది మొక్కలు విడుదల చేసే సేంద్రియ సమ్మేళనాలు, మట్టిలోని సూక్ష్మజీవుల కలయిక వల్ల ఏర్పడుతుంది. రైతులు ఈ వాసనను వర్షం రాకకు సూచనగా భావిస్తారు.
శీతల గాలి స్పందన
కొన్ని పర్వత ప్రాంతాల్లోని జెన్షియన్ (Gentian) పువ్వులు వర్షానికి ముందు వచ్చే చల్లని గాలిని గ్రహించి, తమ రేకులును మూసేస్తాయి - తద్వారా పుప్పొడి వర్షంలో కొట్టుకుపోకుండా కాపాడుకుంటాయి.
భారతదేశంలో సాంప్రదాయ అంచనాలు..
భారతదేశంలోని గ్రామీణ, గిరిజన సమాజాలు శతాబ్దాలుగా ప్రకృతి సూచనలపై ఆధారపడి జీవిస్తున్నాయి. తమిళనాడు, మణిపూర్ రాష్ట్రాల్లో రైతులు చెట్లు పుష్పించడం, కప్పల అరుపులు, చెదపురుగుల ఎగరటం వంటి వాటిని వర్ష సూచనలుగా గమనిస్తారు. త్రిపుర రాష్ట్రంలోని 19 గిరిజన సమూహాలు రాత్రిపూట జాస్మిన్ పుష్పించే విధానం ఆధారంగా వర్షాన్ని అంచనా వేస్తారు. టిబెట్ పీఠభూమిలో గడ్డి జాతుల ఆకులు విప్పుకునే విధానం వర్షాకాలం ప్రారంభాన్ని సూచిస్తుందని శాస్త్రవేత్తలు కనుగొన్నారు. ఈ సాంప్రదాయ జ్ఞానం తరతరాల అనుభవం మీద ఆధారపడి ఉంటుంది. నేటి వాతావరణ శాస్త్రవేత్తలు కూడా ఈ సాంప్రదాయ పద్ధతులు ఆధునిక వాతావరణ అంచనాలను మెరుగుపరచడంలో ఉపయోగపడతాయని అంగీకరిస్తున్నారు.
మొక్కలు వాస్తవంగా వర్షాన్ని అంచనా వేయవు - కానీ అవి వర్షానికి ముందు వచ్చే పర్యావరణ మార్పులకు స్పందిస్తాయి. ఈ స్పందనలను గమనించడం ద్వారా మన పూర్వీకులు ఒక అద్భుతమైన జ్ఞాన వ్యవస్థను అభివృద్ధి చేశారు. నేడు మనకు వాతావరణ ఉపగ్రహాలు, కంప్యూటర్ మోడళ్లు ఉన్నాయి. కానీ ప్రకృతి ఇచ్చే ఈ నిశ్శబ్ద సూచనలు ఇప్పటికీ వాటి ప్రాముఖ్యతను కోల్పోలేదు. ముఖ్యంగా వ్యవసాయం వంటి రంగాల్లో, భూ స్థాయి సమాచారం కోసం ఇవి ఇంకా ఉపయోగపడతాయి. ఈసారి మీరు ఒక పువ్వు మూసుకుపోవడం గానీ, ఒక ఆకు వాలిపోవడం గానీ చూస్తే - ఆ ప్రకృతి మీకు ఏదో చెప్పడానికి ప్రయత్నిస్తోందని గుర్తుంచుకోండి. బహుశా అది వర్షం రాకను సూచిస్తున్న సంకేతం కావచ్చు!
కామెంట్లు (0)