- ఏడాది పరిశోధనలో ఎన్నో కీలక ఆవిష్కరణలు
న్యూఢిల్లీ: భారత అంతరిక్ష పరిశోధనా సంస్థ (ఇస్రో) ప్రతిష్ఠాత్మక సౌర మిషన్ ఆదిత్య ఎల్-1 సూర్యుడి రహస్యాలను ఛేదించే దిశగా కీలక ముందడుగు వేసింది. సౌర జ్వాలలు, సూర్యుని వాతావరణంలోని మార్పులపై ఏడాది పాటు నిర్వహించిన అధ్యయనంలో శాస్త్రవేత్తలు పలు ఆసక్తికర విషయాలను గుర్తించారు. సూర్యుని వాతావరణం, ప్లాస్మా ప్రవాహాల తీరుపై ఈ పరిశోధన విలువైన సమాచారాన్ని అందించింది. సోలార్ అల్ట్రావైలెట్ ఇమేజింగ్ టెలిస్కోప్ (SUIT) సహాయంతో ఈ పరిశోధనలు చేపట్టారు. సూర్యుని ఫోటోస్పియర్, క్రోమోస్పియర్‌లకు సంబంధించిన అత్యంత స్పష్టమైన అతినీలలోహిత చిత్రాలను ఆదిత్య ఎల్-1 సేకరించింది. సూర్యుని నుంచి వెలువడే ప్లాస్మా ప్రవాహం అన్ని ప్రాంతాల్లో ఒకే విధంగా ఉండదనే కీలక అంశాన్ని ఈ అధ్యయనం వెల్లడించింది.
ఆదిత్య ఎల్-1ను 2023 సెప్టెంబర్ 2న ఇస్రో ప్రయోగించింది. అనంతరం 2024 జనవరి 6న భూమికి సుమారు 15 లక్షల కిలోమీటర్ల దూరంలో ఉన్న లాగ్రాంజ్ పాయింట్-1 (L1) వద్దకు చేరుకుంది. అక్కడి నుంచి సూర్యుడిని నిరంతరం పరిశీలించేలా ఈ వ్యోమనౌకను హాలో కక్ష్యలో ప్రవేశపెట్టారు. ఈ మిషన్ కాలపరిమితి ఐదేళ్లు. భూమి నీడ వల్ల ఏర్పడే అంతరాయాలను మినహాయిస్తే, సూర్యుడిని నిరంతరం పరిశీలిస్తూ శాస్త్రీయ సమాచారాన్ని భూమికి పంపించే సామర్థ్యం ఆదిత్య ఎల్-1కు ఉంది. ఇందులోని SUIT పరికరం సూర్యుని వివిధ పొరల్లో చోటుచేసుకునే మార్పులను విశ్లేషిస్తోంది.
ఈ పరిశోధనల ద్వారా సౌర జ్వాలలు ఎలా ఏర్పడతాయి? సూర్యుని వాతావరణంలో ప్లాస్మా ప్రవాహాలు ఎలా మారుతాయి? వంటి కీలక ప్రశ్నలకు సమాధానాలు లభించే అవకాశం ఉంది. భవిష్యత్తులో సౌర తుఫానులు, అంతరిక్ష వాతావరణ మార్పులను ముందుగానే అంచనా వేయడంలో ఆదిత్య ఎల్-1 పరిశోధనలు కీలక పాత్ర పోషించనున్నాయి. భారత అంతరిక్ష పరిశోధనల్లో ఈ మిషన్ మరో చారిత్రాత్మక మైలురాయిగా నిలుస్తోంది.
కామెంట్‌లు (0)