కదిలిన ఖైరతాబాద్ బడా గణేశుడు

తెలంగాణ : హైదరాబాద్ నగరంలో వినాయక నిమజ్జన వేడుకలు అత్యంత వైభవంగా, కన్నులపండుగగా సాగుతున్నాయి. శుక్రవారం ప్రసిద్ధి ఖైరతాబాద్‌ బడా గణేశుడి శోభాయాత్ర ఎట్టకేలకు ప్రారంభమైంది. విగ్రహం చుట్టూ అవసరమైన వెల్డింగ్ పనులను పూర్తి చేసిన అనంతరం ... బడా గణనాథుడిని ప్రత్యేకంగా సిద్ధం చేసిన టస్కర్‌ వాహనం పైకి ఘనంగా చేర్చారు. సాంకేతిక కారణాల వల్ల ఈరోజు ఉదయం 6 గంటలకు ప్రారంభం కావాల్సిన శోభాయాత్ర కాస్త ఆలస్యంగా కదిలింది. మధ్యాహ్నం 2 గంటల సమయానికి నిమజ్జన కార్యక్రమాన్ని పూర్తిగా ముగించేలా అధికారులు ఏర్పాట్లు చేశారు. ఎన్టీఆర్ మార్గ్‌లోని క్రేన్ నంబర్ 5 వద్ద విగ్రహాన్ని హుస్సేన్‌సాగర్‌లో నిమజ్జనం చేయనున్నారు. ఈ క్రమంలో ... లక్షలాది మంది ప్రజలు తరలివస్తుండటంతో నగరంలో ఎలాంటి అవాంఛనీయ ఘటనలు జరగకుండా పోలీసులు పకడ్బందీ ఏర్పాట్లు చేశారు. శివారు ప్రాంతాల నుంచి హుస్సేన్‌సాగర్ చుట్టుపక్కల ప్రాంతాల వరకు నాలుగు కమిషనరేట్ల పరిధిలో అసాధారణ రీతిలో ఏకంగా 45 వేల మంది పోలీసులతో భద్రతను ఏర్పాటు చేశారు. ఒక్క హుస్సేన్‌సాగర్ పరిసరాల్లోనే సుమారు వెయ్యి మంది పోలీసులు నిరంతరం అప్రమత్తంగా విధుల్లో కొనసాగుతున్నారు.