న్యూఢిల్లీ : గత ఓటర్ల జాబితాలో పేరు ఉండి, ఇప్పుడు ఎస్ఐఆర్ ప్రక్రియలో లేదా ఆ తర్వాత 'ఫారం 6'ను సమర్పించినంత మాత్రాన, అటువంటి ఓటర్లపై 'ప్రజా ప్రాతినిధ్య చట్టం, 1950'లోని సెక్షన్ 31 కింద ఎటువంటి చర్యలు తీసుకోవద్దని ఎన్నికల నమోదు అధికారులు (ఇఆర్‌ఒల)ను భారత ఎన్నికల సంఘం (ఇసిఐ) ఆదేశించింది.
అయితే, వారు ఇప్పటికే వేరే పార్లమెంటరీ లేదా అసెంబ్లీ నియోజకవర్గంలో ఓటరుగా నమోదు కాకూడదని పేర్కొంది. ఈ మేరకు మంగళవారం ఒక ప్రకటన విడుదల చేసింది. అన్ని రాష్ట్రాలు, కేంద్రపాలిత ప్రాంతాల ప్రధాన ఎన్నికల అధికారులకు రాసిన లేఖలో, డ్రాఫ్ట్ ఓటర్ల జాబితాలో పేర్లు లేని వ్యక్తులు — గతంలో నమోదై ఉన్నా సరే — ఎస్ఐఆర్ ప్రక్రియలో లేదా ఆ తర్వాత కొత్తగా నమోదు కోసం దరఖాస్తు చేసుకోవాలని ఇసిఐ స్పష్టం చేసింది. " 'ఫారం 6'ను సమర్పించడం అనేది ఎస్ఐఆర్ ప్రక్రియలో లేదా ఆ తర్వాత ఓటర్ల జాబితాలో పేరు చేర్చుకోవడానికి ఉద్దేశించినదే తప్ప, గతంలో నమోదు కలిగి ఉన్నారనే కారణంతో ఇది తప్పుడు సమాచారం అని పరిగణించబడదు" అని ఇసిఐ పేర్కొంది.
'ఇది తప్పుడు ప్రకటన కాదు'
ఢిల్లీ హైకోర్టులో 'నీలోత్పల్ దత్తా అండ్‌ ఇతర వర్సెస్ భారత ఎన్నికల సంఘం అండ్‌ ఇతరుల కేసులో వెలువడిన తీర్పుకు అనుగుణంగానే ఈ స్పష్టత ఇచ్చినట్లు ఇసిఐ తెలిపింది. ఆ కేసులో, ఫారం 6 సమర్పించడం తప్పుడు ప్రకటన చేసినట్లే అవుతుందన్న దరఖాస్తుదారుడి ఆందోళన అసంబద్ధమైనదని కోర్టు పేర్కొంది. పిటిషనర్లు చట్ట ప్రకారం ఫారం 6ను పరిశీలన కోసం సమర్పించవచ్చని గమనిస్తూ, కోర్టు విచారణను ముగించింది.
ఫారం 6 ద్వారా తిరిగి నమోదు చేసుకునే ఓటర్లు, తాము మొదటిసారి ఓటు వేస్తున్నామని ప్రకటించే నిబంధన ఉన్నందున, ఎన్నికల చట్టం ప్రకారం శిక్షార్హమైన చర్యలను ఎదుర్కోవలసి వస్తుందన్న 2022 ఆగస్టు 1 నాటి నిబంధనలు అమలులో ఉన్నందున ఇసిఐ ఈ వివరణ ఇచ్చింది. ఒక ఓటరు గతంలో ఓటర్ల జాబితాలో కనిపించి, ఎస్ఐఆర్ సమయంలో గానీ లేదా ఆ తర్వాత గానీ ఫారం 6 సమర్పించినంత మాత్రాన, ప్రజా ప్రాతినిధ్య చట్టం, 1950లోని సెక్షన్ 31 కింద ఎలక్టోరల్ రిజిస్ట్రేషన్ అధికారులు (ఇఆర్ఓలు) చర్యలు ప్రారంభించకూడదని ఇసిఐ లేఖలో ఆదేశించింది. ఓటరు ఇప్పటికే మరో పార్లమెంటరీ లేదా అసెంబ్లీ నియోజకవర్గంలో నమోదు కాకుండా ఉండి, ఆ ప్రకటన చట్టానికి అనుగుణంగా ఉన్నట్లయితే ఇది వర్తిస్తుంది. బెంగాల్‌లోని ట్రిబ్యునల్ న్యాయమూర్తులు ఉత్తర్వులపై ఇ-సంతకం చేసి, అప్‌లోడ్ చేయడానికి ఇసిఐ వీలు కల్పించనుంది.
కామెంట్‌లు (0)