ఓటు హక్కు అమూల్యమైనది, అమ్ముకోవద్దు : పివి.రమేష్‌ విజ్ఞప్తి

అమరావతి : ఓటు హక్కు అమూల్యమైనదని, అమ్ముకోవద్దని న్యాయవాది, ఫిజీషియన్‌ పి.వి. రమేష్‌ ప్రజలకు పిలుపునిచ్చారు. ఆంధ్రప్రదేశ్ రాష్ట్రం గూండాలు, రౌడీలు, సంఘ విద్రోహ శక్తులకు స్వర్గధామంగా దిగజారడాన్ని చూడటం హృదయ విదారకంగా ఉందని అన్నారు. భారతదేశంలోని అత్యంత ప్రగతిశీల రాష్ట్రాలలో ఒకటిగా వెలుగొందిన ఈ రాష్ట్రంలో, రెండు కుటుంబ యాజమాన్యంలోని పార్టీలు కలిసికట్టుగా మధ్యయుగాల నాటి భూస్వామ్య వ్యవస్థను పునరుద్ధరించడానికి ప్రయత్నిస్తూ, రాష్ట్రాన్ని తమ ఆధీనంలోకి తెచ్చుకోవడం వల్ల ఈ పరిస్థితి ఏర్పడిందని అన్నారు. కులతత్వం, బంధుప్రీతి, అవినీతి, విషపూరిత రాజకీయీకరణ మొదలైన వాటితో కీలక పరిపాలనా సంస్థలు కలుషితమయ్యాయని అన్నారు. రాజకీయాలు కాంట్రాక్టర్లు, మైనింగ్ డాన్‌లు, విద్యా, ఆరోగ్య శాఖాధిపతులు, మద్యం కాంట్రాక్టర్లు, పైరవీకారులు, గూండాల ప్రత్యేక ఆధిపత్యంగా మారిపోయాయని ఆగ్రహం వ్యక్తం చేశారు. పోలీసులు అధికార పార్టీకి ప్రైవేట్ సైన్యంగా వ్యవహరిస్తున్నారని మండిపడ్డారు. రాజకీయ పార్టీలు ఒకరినొకరు నాశనం చేయాల్సిన శత్రువులుగా చూసుకున్నప్పుడు, ఎన్నికలు ఆయుధాలు, డబ్బుతో పోరాడాల్సిన యుద్ధంగా మారినప్పుడు, దానిని ప్రజాస్వామ్యంగా వర్గీకరించలేమని, ఇది రాక్షస పాలన అని అన్నారు. రాష్ట్రంలో స్వేచ్ఛాయుత, నిష్పక్షపాత ఎన్నికలు జరుగుతాయని ఆశించడం పగటి కల మాత్రమేనని అన్నారు. ఎఐ, క్వాంటం, ప్రపంచ స్థాయి నగరం వంటి ప్రకటనలు చేసినప్పటికీ, ఆంధ్రప్రదేశ్ అనేక విధాలుగా అత్యంత పతనావస్థకు చేరుకుని, మిగతా భారతదేశానికి ఒక ‘ఆదర్శంగా నిలుస్తోందని అన్నారు. ఏపి ప్రజలు వాస్తవాన్ని గ్రహించి, వైఎస్ఆర్‌సిపి పార్టీకిగాని, ఎన్‌డిఎ కూటమి, టిడిపి, జనసేన పార్టీ, బిజెపి కూటమిలకు గానీ ఓటు వేయకుండా ఈ నేరపూరిత కుట్రకు ముగింపు పలకాలని తాను విజ్ఞప్తి చేస్తున్నానని అన్నారు. ప్రజాహిత భావాలున్న ఇతర అభ్యర్థులు ఎవరైనా ఉంటే వారికి ఓటు వేయాలని పిలుపునిచ్చారు.