వైసిపి అభ్యర్థి రవికుమార్‌ నామినేషన్‌కు ఆటంకాలు సృష్టించవద్దు

- పోలీసులకు హైకోర్టు ఆదేశం

ప్రజాశక్తి-గుంటూరు జిల్లా ప్రతినిధి : దాచేపల్లి మున్సిపాలిటీ చైర్మన్‌‌గా పోటీ చేయనున్న వైసిపి అభ్యర్థి కొప్పుల రవికుమార్‌‌ నామినేషన్‌‌కు ఎటువంటి ఆటంకాలు సృష్టించవద్దని పోలీసులను హైకోర్టు ఆదేశించింది. అక్రమ మద్యం కేసు పెట్టి అరెస్టు చేసి రవికుమార్‌‌ను జైలుకు పంపిన విషయం తెలిసిందే. పోలీసుల చర్యలను రవికుమార్‌ ‌బంధువులు గురజాల కోర్టులో పిటీషన్‌ ‌దాఖలు చేశారు. నామినేషన్లు దాఖలు చేయనివ్వడం లేదని, అక్రమ కేసు పెట్టారని రవికుమార్‌ ‌తరుఫున న్యాయవాది కోర్టు దృష్టికి తీసుకువచ్చారు. వెంటనే కోర్టు జోక్యం చేసుకుని ఆయనకు బెయిల్‌ ‌మంజూరు చేసింది. ఆదివారం నామినేషన్‌‌కు అవకాశం కల్పించాలని ఎటువంటి ఆటంకాలు సృష్టించవద్దని పోలీసులను ఆదేశించింది. ఈనేపధ్యంలో శనివారం రవికుమార్‌ ‌తరఫున ఆయన సోదరుడు, మరికొంత మంది నామినేషన్లు దాఖలు చేయడానికి ప్రయత్నించగా పోలీసులు అడ్డుకున్నారు. దాచేపల్లికి సమీపంలో ముత్యాలంపాడు రోడ్డు వద్దకు రాగానే 144 సెక్షన్ అమల్లో ఉందని గుంపులు గుంపులుగా వెళ్లరాదని పోలీసులు అడ్డుకున్నారు. ఈలోగా టిడిపి కార్యకర్తలు వచ్చి వారిని నిలిపివేశారు. దీంతో ఇరువురి మధ్య ఘర్షణ నెలకొంది. పోలీసులు లాఠీఛార్జి చేశారు. దీంతో వారు నామినేషన్‌ ‌వేయకుండా వెనుదిరిగారు. మాచర్లలో మాజీ ఎమ్మెల్యే పిన్నెల్లి రామకృష్ణారెడ్డిని పోలీసులు గృహ నిర్బంధంలో ఉంచారు.