షార్ లో యువికా కార్యక్రమం ప్రారంభం

ప్రజాశక్తి - సూళ్లూరుపేట : ఇస్రో శ్రీహరికోటలోని ఎస్‌డిఎస్‌సి షార్‌లో యువికా కార్యక్రమాన్ని ప్రారంభించింది. 13వ తేదీ నుండి 18వ తేదీ వరకు వారంరోజుల పాటు ఈ కార్యక్రమం జరగనుంది. యువ విద్యార్థులకు అంతరిక్ష సాంకేతికత,అంతరిక్ష శాస్త్రం మరియు అంతరిక్ష అనువర్తనాలపై ప్రాథమిక జ్ఞానాన్ని అందించడానికి యువికాను రూపొందించిన సంగతి తెలిసిందే. ప్రధాని మోడీ 2025 డిసెంబర్ 18న ఒమన్‌లో పర్యటించిన సందర్భంగా, అక్కడి విద్యార్థుల కోసం ఈ కార్యక్రమాన్ని నిర్వహించనున్నట్లు ప్రకటించారు. దీంతో ఇస్రో శ్రీహరికోటలోని ఎస్‌డిఎస్‌సి షార్ లో ఒక వారం పాటు ఈ కార్యక్రమం కోసం ప్రణాళిక రూపొందించింది. విదేశాంగ మంత్రిత్వ శాఖ ( ఎంఈఏ ) ద్వారా ప్రాసెస్ చేసింది. దీనికి కొనసాగింపుగా, ఒమన్ సుల్తానేట్ విద్యా మంత్రిత్వ శాఖ, ఈ కార్యక్రమంలో పాల్గొనడానికి ఒమానీ పాఠశాలల నుండి ఎనిమిది మంది విద్యార్థులను మరియు ఇద్దరు పరిశీలకులను నామినేట్ చేసింది. ఈ కార్యక్రమాన్ని 13 జూలై, 2026న ఎస్‌డిఎస్‌సి షార్ డైరెక్టర్ ఎస్.ముత్తుచెజియన్ ప్రారంభించారు.ఈ కార్యక్రమంలో తరగతి గది శిక్షణ, ప్రయోగాల ఆచరణాత్మక ప్రదర్శనలు, రోబోటిక్ కిట్‌లతో ప్రత్యక్ష అనుభవం, మోడల్ రాకెట్రీ,క్షేత్ర పర్యటనలు, ఇస్రో శాస్త్రవేత్తలతో చర్చలు ఉంటాయి.