స్టీల్ ప్లాంట్ ప్రైవేటీకరణకు వ్యతిరేకంగా 2,000వ రోజు దీక్ష

ప్రజాశక్తి-విశాఖపట్నం: విశాఖ స్టీల్ ప్లాంట్‌ను ప్రైవేటీకరణ చేయకూడదని డిమాండ్ చేస్తూ అఖిలపక్ష కార్మిక సంఘాల ఆధ్వర్యంలో చేపట్టిన రిలే నిరాహార దీక్షలు 2,000వ రోజుకు చేరుకున్నాయి. ఈ సందర్భంగా జీవీఎంసీ గాంధీ విగ్రహం వద్ద నిరసన కార్యక్రమం నిర్వహించారు. ఈ కార్యక్రమానికి అఖిలపక్ష కార్మిక సంఘాల నాయకుడు ఎం. జగ్గి నాయుడు అధ్యక్షత వహించారు. ఈ సందర్భంగా వివిధ కార్మిక సంఘాల నాయకులు పాల్గొని స్టీల్ ప్లాంట్ ప్రైవేటీకరణ నిర్ణయాన్ని ఉపసంహరించుకోవాలని డిమాండ్ చేశారు. కార్యక్రమంలో సీఐటీయూ నాయకులు ఆదినారాయణ, ఐఎన్‌టీయూసీ నాయకులు నాగభూషణం, ఏఐటీయూసీ నాయకులు మన్మధరావు, వైఎస్సార్‌టీయూ నాయకులు రమణారెడ్డి తదితరులు పాల్గొన్నారు.