చెన్నై : ప్రముఖ తమిళ సినీ సంగీత దర్శకుడు, గాయకుడు ‘తేనిసై తేండ్రల్‌’ దేవా (75) శనివారం చెన్నైలో కన్నుమూశారు. ఉదయం 8.30 గంటల సమయంలో అస్వస్థతకు గురైన ఆయనను సూర్య ఆసుపత్రిలో చేర్పించగా,చికిత్స పొందుతూ మృతి చెందారు. 1950 నవంబర్ 20న జన్మించిన దేవా, మూడు దశాబ్దాలకు పైగా సాగిన తన సంగీత ప్రస్థానంలో తమిళం, తెలుగు, కన్నడ, మలయాళ భాషల్లో వందలాది చిత్రాలకు సంగీతం అందించారు. అన్నామలై, బాషా, ఆశై, కాదల్‌ కోట్టై, నేరుక్కు నేర్‌, ప్రియముడన్‌, వాలి, వంటి చిత్రాలు ఆయనకు మంచి గుర్తింపు తెచ్చిపెట్టాయి.
తెలుగులో ‘శ్రీమాన్ బ్రహ్మచారి’ సినిమాకు తొలిసారి సంగీతం అందించిన దేవా.. చిరంజీవి హీరోగా వచ్చిన ‘మాస్టర్‌’, పవన్‌ కల్యాణ్‌ ‘తొలిప్రేమ’తో పాటు ‘ఆటోడ్రైవర్‌’, ‘బాగున్నారా’, ‘ నాగ’ తదితర సినిమాలకు పనిచేశారు.
జానపద బాణీలతో పాటు మధురమైన ప్రేమగీతాలు, భక్తి పాటలతోనూ ప్రేక్షకులను ఆకట్టుకున్నారు. తమిళనాడు ప్రభుత్వం అందించే కలైమామణి పురస్కారంతో ఆయన గౌరవం పొందారు. ఆశై చిత్రానికి ఉత్తమ సంగీత దర్శకుడిగా తమిళనాడు రాష్ట్ర చలనచిత్ర పురస్కారం కూడా అందుకున్నారు. ఆయన కుమారుడు శ్రీకాంత్‌ దేవా సినీ సంగీత దర్శకుడిగా గుర్తింపు పొందగా, సోదరులు శబేష్‌, మురళి కూడా సంగీత రంగంలో పనిచేశారు. దేవా మరణంతో సినీ సంగీత రంగంలో విషాదం నెలకొంది.
కామెంట్‌లు (0)