- 3,000 మందికి పైగా తొలగింపు
కాలిఫోర్నియా: ప్రముఖ రైడ్-హెయిలింగ్ సంస్థ ఉబెర్ ప్రపంచవ్యాప్తంగా 3,000 మందికి పైగా ఉద్యోగులను తొలగించేందుకు సిద్ధమవుతోంది. ఇది కంపెనీ మొత్తం ఉద్యోగుల్లో దాదాపు 10 శాతానికి సమానం. తాజా ఉద్యోగ కోతలతో ఉబెర్లో పనిచేసే వారి సంఖ్య 2021 నాటి స్థాయికి చేరుకోనుంది. ఉద్యోగులకు పంపిన ఈమెయిల్లో ఉబెర్ సీఈఓ దారా ఖోస్రోషాహి ఈ నిర్ణయాన్ని సమర్థించారు. కంపెనీ వేగంగా విస్తరించిన సమయంలో అనేక యాజమాన్య స్థాయిలు, చిన్న చిన్న బృందాలు ఏర్పడ్డాయని, దీంతో నిర్ణయాలు తీసుకునే ప్రక్రియ నెమ్మదించిందని ఆయన తెలిపారు. సంస్థను మరింత సమర్థవంతంగా మార్చేందుకు పునర్వ్యవస్థీకరణ అవసరమైందని పేర్కొన్నారు.
తాజా తొలగింపుల్లో మేనేజర్లు, ఇతర ఉద్యోగులు ప్రభావితమయ్యే అవకాశం ఉంది. అయితే ఏ దేశాలు లేదా ప్రాంతాల్లో అత్యధిక ఉద్యోగ కోతలు ఉంటాయనే విషయాన్ని ఉబెర్ వెల్లడించలేదు. ఈ ప్రకటన వెలువడిన అనంతరం కంపెనీ షేర్ ధర దాదాపు 2 శాతం పెరిగింది. పునర్వ్యవస్థీకరణ ద్వారా ఉబెర్ ఏడాదికి సుమారు 2 బిలియన్ డాలర్ల వరకు ఖర్చులను ఆదా చేసుకునే అవకాశం ఉందని నిపుణులు అంచనా వేస్తున్నారు.
మరోవైపు, ఉద్యోగుల సంఖ్యను తగ్గిస్తున్నప్పటికీ స్వయంచాలక వాహనాలు, రైడ్-హెయిలింగ్, డెలివరీ, రోబోటాక్సీ వంటి రంగాల్లో ఉబెర్ పెట్టుబడులు, భాగస్వామ్యాలను పెంచుతోంది. ముఖ్యంగా డ్రైవర్లెస్ టాక్సీ సేవలపై కంపెనీ దృష్టి సారిస్తోంది. డ్రైవర్ అవసరం లేని టాక్సీ సేవలను వినియోగించేందుకు ఆసక్తి ఉందా అని ఉబెర్ తన వినియోగదారులను అడుగుతున్నట్లు సమాచారం. స్వయంచాలక వాహనాల రంగంలో భాగస్వామ్యాలను మరింత బలోపేతం చేసుకునే వ్యూహంలో భాగంగానే ఈ చర్యలు చేపడుతున్నట్లు తెలుస్తోంది. ఇదిలా ఉండగా, ఉద్యోగులు నిర్ణీత కార్యాలయాల నుంచే పనిచేయాలని ఉబెర్ ప్రతిపాదించింది. రిమోట్ వర్క్ను సుమారు 1 శాతానికి పరిమితం చేయాలని కంపెనీ నిర్ణయించినట్లు సమాచారం. తాజా ఉద్యోగ కోతలు పూర్తయిన తర్వాత ఉబెర్లోని మొత్తం ఉద్యోగుల సంఖ్య 30,000 కంటే తక్కువకు పడిపోయే అవకాశం ఉంది.
కామెంట్లు (0)