అర్నబ్ తుఫాన్‌ వల్ల నష్టపోయిన పంటలను పరిశీలించిన జిల్లా అధ్యక్షులు చిర్ల జగ్గిరెడ్డి

పెనికేరు, పినపల్ల, చింతలూరు, సూర్యారావుపేట గ్రామాల్లో రైతులు, కౌలు రైతులకు పరామర్శ

తుఫాన్‌ దెబ్బకు తీవ్రంగా నష్టపోయిన రైతులను ప్రభుత్వం తక్షణమే ఆదుకోవాలి

పంట నష్టాలను అంచనా వేసి అర్హులైన ప్రతి రైతుకు పరిహారం అందించాలి

ప్రజాశక్తి - ఆలమూరు (కోనసీమ) : నియోజకవర్గంలో అర్నబ్ తుఫాన్ కారణంగా పంట నష్టపోయిన రైతులకు వెంటనే పరిహారం చెల్లించాలని డాక్టర్ బి.ఆర్. అంబేద్కర్ కోనసీమ జిల్లా వైఎస్ఆర్ కాంగ్రెస్ పార్టీ అధ్యక్షులు, మాజీ ఎమ్మెల్యే చిర్ల జగ్గిరెడ్డి డిమాండ్ చేశారు. ఈ మేరకు మండలంలోని పెనికేరు, పినపల్ల, చింతలూరు, సూర్యారావుపేట లల్లో గురువారం ఆయన వైసీపీ శ్రేణులతో కలిసి పర్యటించి పంట నష్టాలను క్షేత్రస్థాయిలో పరిశీలించారు. ఈ సందర్భంగా నష్టపోయిన రైతులు, కౌలు రైతులను పరామర్శించి, వారి సమస్యలను అడిగి తెలుసుకున్నారు. తుఫాన్ ప్రభావంతో పంటలు దెబ్బతినడం వల్ల రైతులు తీవ్ర ఆందోళనకు గురవుతున్నారని, ఎంతో కష్టపడి, అప్పులు చేసి పెట్టుబడులు పెట్టి సాగు చేసిన పంటలు ప్రకృతి వైపరీత్యాల కారణంగా నష్టపోవడం బాధాకరమని చిర్ల జగ్గిరెడ్డి పేర్కొన్నారు. వ్యవసాయంపైనే ఆధారపడి జీవిస్తున్న రైతులు పంట నష్టాల కారణంగా ఆర్థికంగా తీవ్ర ఇబ్బందులు ఎదుర్కొనే పరిస్థితి ఏర్పడిందని ఆవేదన వ్యక్తం చేశారు. ముఖ్యంగా ఇతరుల భూములను కౌలుకు తీసుకుని సాగు చేస్తున్న కౌలు రైతుల పరిస్థితి మరింత దయనీయంగా ఉందని, పంట నష్టపోయినా కౌలు చెల్లించాల్సిన పరిస్థితి వారిని ఆర్థిక సంక్షోభంలోకి నెట్టే ప్రమాదం ఉందని తెలిపారు. తుఫాన్ ప్రభావిత గ్రామాల్లో వ్యవసాయ, రెవెన్యూ శాఖల అధికారులు వెంటనే పర్యటించి పంట నష్టాలను సమగ్రంగా అంచనా వేయాలని, నష్టపోయిన ప్రతి గ్రామంలో క్షేత్రస్థాయిలో పరిశీలనలు నిర్వహించి వాస్తవ నష్టాలను నమోదు చేయాలని ఆయన కోరారు. పంట నష్టాల అంచనాలో ఎలాంటి నిర్లక్ష్యానికి తావివ్వకుండా, అర్హులైన రైతులందరికీ ప్రభుత్వ నిబంధనల ప్రకారం నష్టపరిహారం అందేలా చర్యలు తీసుకోవాలని డిమాండ్ చేశారు. కౌలు రైతులకు కూడా తగిన ప్రాధాన్యతనిస్తూ, వారికి న్యాయం జరిగేలా ప్రభుత్వం స్పందించాలని సూచించారు. రైతులకు సకాలంలో సహాయం అందకపోతే వారు మరింత ఆర్థిక ఇబ్బందులు ఎదుర్కోవాల్సి వస్తుందని, అందువల్ల పంట నష్టాల అంచనా, పరిహారం మంజూరు ప్రక్రియలో ఎలాంటి జాప్యం జరగకుండా చూడాలని అన్నారు. రైతుల కష్టాలను ప్రభుత్వం గుర్తించి తక్షణ సహాయక చర్యలు చేపట్టాలని, అన్నదాతలకు భరోసా కల్పించాలని చిర్ల జగ్గిరెడ్డి కోరారు. రైతులు ధైర్యంగా ఉండాలని, ఈ కష్టకాలంలో వైఎస్ఆర్ కాంగ్రెస్ పార్టీ వారికి అండగా ఉంటుందని భరోసా ఇచ్చారు. రైతులు, కౌలు రైతులు ఎదుర్కొంటున్న సమస్యలను ప్రభుత్వం దృష్టికి తీసుకెళ్లి, వారికి న్యాయం జరిగే వరకు తమ వంతు కృషి చేస్తామని తెలిపారు. ప్రకృతి వైపరీత్యాల వల్ల నష్టపోయిన రైతుల పట్ల ప్రభుత్వం మానవతా దృక్పథంతో వ్యవహరించి, అర్హులైన ప్రతి రైతుకు న్యాయం జరిగేలా తక్షణ చర్యలు తీసుకోవాలని చిర్ల జగ్గిరెడ్డి డిమాండ్ చేశారు. ఈ కార్యక్రమంలో వైసీపీ మండల కన్వీనర్ తమ్మన శ్రీనివాస్, వైసిపి సీనియర్ నేత చల్లా ప్రభాకర్రావు, తదితరనేతలు పాల్గొన్నారు.