ఉపాధ్యాయిని సుజాతకు రాష్ట్రస్థాయి ఎక్సలెన్స్ అవార్డు

ప్రజాశక్తి - ఆలమూరు (కోనసీమ) : కాకినాడకు చెందిన చేయూత చారిటబుల్ సొసైటీ ప్రకటించిన రాష్ట్రస్థాయి టీచర్ ఎక్సలెన్స్ అవార్డు-2026 కు మండలంలోని కొత్తూరు మండల ప్రజా పరిషత్ ప్రాథమిక పాఠశాల ఉపాధ్యాయిని కొమ్మిశెట్టి సుజాతకు దక్కింది. విద్యారంగంలో వస్తున్న నూతన మార్పులకు అనుగుణంగా బోధన చేస్తున్నందుకుగాను, బోధనలో కృత్యాధార పద్ధతులు, వినూత్న పద్ధతుల ద్వారా బోధిస్తున్నందుకుగాను ఆమె ఈ అవార్డుకు ఎంపికయ్యారు. దీంతో ఈ నెల 12న కాకినాడలో జరిగిన చేయూత స్వచ్ఛంద సేవా సంస్థ తొమ్మిదవ వార్షికోత్సవాలలో భాగంగా కాకినాడ ఎమ్మెల్యే వనమాడి కొండబాబు, ఆర్ జె డి నాగమణి ,ఎమ్మెల్సీ పేరాబత్తుల రాజశేఖర్, ఆదిత్య విద్యాసంస్థల అధినేత నల్లమిల్లి శేషారెడ్డి చేతుల మీదుగా ఈ అవార్డును అందుకున్నారు. సుజాతకు ఈ అవార్డు రావడం పట్ల పాఠశాలకు రాష్ట్రస్థాయిలో గుర్తింపు తీసుకువచ్చినందుకు మండల విద్యాశాఖ అధికారులు బి.అప్పాజీ, ఎన్.రాజు, యుటిఎఫ్ రాష్ట్ర నాయకులు పాఠశాల హెచ్ఎం వై.వి.వి.రమణ, ఉపాధ్యాయ సంఘ నాయకులు, విద్యార్థులు, తదితరులు ఆదివారం ఆమెను అభినందిస్తూ శుభాకాంక్షలు తెలియజేశారు.