ఆదివాసుల హక్కుల పరిరక్షణకు భారీ ర్యాలీ

ప్రజాశక్తి-కురుపాం: ఆదివాసుల హక్కులను పరిరక్షించాలని డిమాండ్‌ చేస్తూ గురువారం కురుపాం మండల కేంద్రంలో సుమారు వెయ్యి మంది గిరిజనులతో భారీ ర్యాలీ నిర్వహించారు. తుడుము డప్పుల మోతలు, నినాదాలతో గిరిజనులు ర్యాలీలో పాల్గొన్నారు. గిరిజనుల హక్కులకు రక్షణ కల్పించే జీవో నంబర్‌ 3, 1/70 చట్టం తదితర అంశాలను పకడ్బందీగా అమలు చేయాలని వారు డిమాండ్‌ చేశారు. ఈ సందర్భంగా గిరిజన సంఘాల నాయకులు మాట్లాడుతూ ఆదివాసుల హక్కులు, భూములు, ఉద్యోగాలు, విద్య, ఉపాధి వంటి అంశాల్లో గిరిజనులకు రాజ్యాంగం కల్పించిన హక్కులను కాపాడాలని కోరారు. 1/70 చట్టాన్ని పటిష్టంగా అమలు చేసి గిరిజనేతరుల భూదురాక్రమణలను అరికట్టాలని డిమాండ్‌ చేశారు. గిరిజన ప్రాంతాల్లో చట్టాలు, హక్కుల పరిరక్షణకు ప్రభుత్వం తగిన చర్యలు చేపట్టాలని కోరారు. కార్యక్రమంలో గిరిజన సంఘాల నాయకులు, కార్యకర్తలు, మహిళలు, యువత పెద్ద సంఖ్యలో పాల్గొన్నారు.