వినోదం : ఒక సినిమా విజయం సాధించాలంటే మంచి కథ, అద్భుతమైన విజువల్స్, భారీ బడ్జెట్, విస్తృతమైన ప్రచారం అవసరమని సాధారణంగా భావిస్తాం. కానీ.. చైనాలో విడుదలైన ఓ యానిమేషన్ సినిమా మాత్రం ఈ అంచనాలన్నింటినీ తలకిందులు చేసింది. సినిమా బాగోలేదంటూ వచ్చిన ట్రోల్స్.. చివరకు అదే చిత్రానికి భారీ ప్రచారంగా మారాయి. ఫలితంగా కేవలం లక్ష రూపాయలతో తెరకెక్కిన ఈ సినిమా ఏకంగా రూ.20 కోట్లకు పైగా వసూళ్లు సాధించి అందరినీ ఆశ్చర్యపరిచింది.
చైనీస్ యానిమేటెడ్ మూవీ ‘న్యూ లాయ్’ విడుదలకు ముందు, విడుదలైన తొలి రోజుల్లో పెద్దగా ఎవరినీ ఆకట్టుకోలేదు. పైగా.. అత్యంత నాసిరకం త్రిడీ యానిమేషన్ అంటూ సోషల్ మీడియాలో తీవ్ర విమర్శలు ఎదుర్కొంది. అయితే అదే విమర్శలు, ట్రోల్స్ ఈ సినిమాకు ఊహించని స్థాయిలో పాపులారిటీని తెచ్చిపెట్టాయి.
ఆవు, పిచ్చుక నేపథ్యంలో రూపొందిన ఈ చిత్రానికి తొలుత ప్రేక్షకుల నుంచి స్పందన అంతంతమాత్రంగానే ఉంది. విడుదలైన తొలి 10 రోజుల్లో కేవలం 7,705 యువాన్లు (సుమారు 1,140 డాలర్లు) మాత్రమే వసూలు చేసింది. కానీ సోషల్ మీడియాలో ఈ సినిమాకు సంబంధించిన చిన్నచిన్న క్లిప్స్ వైరల్ కావడంతో పరిస్థితి ఒక్కసారిగా మారిపోయింది.
ప్రముఖ మూవీ ట్రాకింగ్ సైట్ ‘మావో యాన్ (Mao Yan)’ ప్రకారం.. ‘న్యూ లాయ్’ బాక్సాఫీస్ వద్ద ఇప్పటికే 11.4 మిలియన్ యువాన్లకు పైగా వసూలు చేసి దూసుకెళ్తోంది. భారీ బడ్జెట్తో తెరకెక్కిన హాలీవుడ్ చిత్రాలైన ‘ది ఒడిస్సీ’, ‘స్పైడర్ మ్యాన్’ వంటి సినిమాలకు సైతం ఇది గట్టి పోటీ ఇవ్వడం విశేషం.
‘సినిమా చూడకపోతే జీవితాంతం బాధపడతారు!’
ఈ సినిమాకు ఇంతటి క్రేజ్ రావడానికి ప్రధాన కారణం సోషల్ మీడియాలో జరుగుతున్న ప్రచారమే. అయితే అది పాజిటివ్ ప్రమోషన్ కాదు.. పూర్తిగా ట్రోలింగ్!
“ఈ సినిమా చూస్తే 80 నిమిషాలు బాధపడతారు.. చూడకపోతే జీవితాంతం పశ్చాత్తాపపడతారు!” అంటూ నెటిజన్లు సరదాగా పోస్టులు చేస్తున్నారు. సినిమాలోని కొన్ని సన్నివేశాలు, గ్రాఫిక్స్కు సంబంధించిన వీడియోలను షేర్ చేస్తూ.. “ఇది మరీ ఘోరంగా ఉంది”, “దీని కంటే ఏఐ ఇంకా బాగా తీస్తుంది” అంటూ కామెంట్లు చేస్తున్నారు.
అయితే.. ప్రేక్షకులను సినిమాకు దూరం చేయాల్సిన ఈ ట్రోల్స్ చివరకు విరుద్ధమైన ఫలితాన్ని ఇచ్చాయి. సినిమా ఎంత చెత్తగా ఉందో తెలుసుకోవాలనే ఆసక్తితోనే చాలామంది థియేటర్లకు క్యూ కడుతున్నారు. దీంతో మొదట్లో ఎవరూ పట్టించుకోని సినిమా.. ఇప్పుడు సోషల్ మీడియా టాక్తో భారీ వసూళ్లు రాబడుతోంది.
‘ఆవు’కు మరో సెంటిమెంట్.. మదుపర్ల ఆసక్తి !
ఈ సినిమాకు మరో ఆసక్తికరమైన అంశం కూడా కలిసొచ్చింది. చైనాలో ‘ఆవు’ (Cow/Bull) అనే పదానికి స్టాక్ మార్కెట్లోని **‘బుల్లిష్ ట్రెండ్’**తో సంబంధం ఉంది. మార్కెట్ లాభాల్లోకి రావాలని కోరుకునే కొందరు మదుపర్లు కూడా ఈ సినిమాను అదృష్టానికి సంకేతంగా భావిస్తూ ఆదరిస్తున్నట్లు తెలుస్తోంది.
ఇక ఈ సినిమా విషయంలో మరో విచిత్రమైన పరిణామం కూడా చోటుచేసుకుంది. సరైన ప్రమోషనల్ పోస్టర్లు కూడా అందుబాటులో లేకపోవడంతో.. థియేటర్ల సిబ్బందే స్వయంగా పోస్టర్లు గీసి ప్రేక్షకులను ఆకర్షిస్తున్నారు.
మొత్తానికి.. మంచి సినిమా అని ప్రచారం చేస్తే ప్రేక్షకులు వస్తారో లేదో తెలియదు.. కానీ ‘ఇది చెత్త సినిమా’ అంటూ ట్రోల్ చేస్తే మాత్రం కోట్ల వసూళ్లు రావొచ్చని ‘న్యూ లాయ్’ నిరూపించింది! ఒకప్పుడు విమర్శలకు గురైన ఈ యానిమేషన్.. ఇప్పుడు అదే విమర్శలను ప్రచారంగా మార్చుకుని బాక్సాఫీస్ వద్ద సంచలనం సృష్టిస్తోంది.
కామెంట్లు (0)