నాలాంటి బస్‌ కండక్టర్‌..

‘జైలర్‌ 2’ ప్రచార కార్యక్రమంలో భాగంగా బెంగళూరులో బస్సు కండక్టర్‌గా చేసినప్పటి రోజులను రజినీకాంత్‌ గుర్తు చేసుకున్నారు. ప్రస్తుతం నటుడిగా అగ్రస్థాయిలో ఉన్నప్పటికీ, కండక్టర్‌గా పనిచేసినప్పుడే ఎక్కువ సంతోషంగా ఉండేవాడినని తెలిపారు. చిత్ర దర్శకుడు నెల్సన్‌ దిలీప్‌కుమార్‌ రజనీకాంత్‌లోని వినయం గురించి ఆ కార్యక్రమంలో ప్రస్తావించారు. దీనికి రజనీ స్పందిస్తూ ‘నేను స్టార్‌ను అయినప్పటికీ, నాకు నటనంటే ఇష్టం. అయితే అంతకంటే బస్సు కండక్టర్‌గా పనిచేయడమే ఇంకా ఇష్టం. నేను అయిదేళ్ల పాటు కండక్టర్‌గా పనిచేశాను. ఇప్పటికీ ఆ ఉద్యోగాన్ని మిస్‌ అవుతుంటాను. నేను తరచూ బెంగళూరు వెళ్లేది కూడా అందుకే. నన్ను నేను ఎప్పుడూ ఓ స్టార్‌గా భావించలేదు. ఇప్పటికీ బస్సు కండక్టర్‌గానే భావిస్తుంటాను. అలాంటప్పుడు, నాలాంటి ఓ బస్సు కండక్టర్‌ మీలాంటి పెద్ద వ్యక్తి ముందు ఎలా ప్రవర్తిస్తారు చెప్పండి?’ అని రజనీకాంత్‌ అన్నారు. ‘జైలర్‌’కు సీక్వెల్‌గా తెరకెక్కిన ‘జైలర్‌ 2’ అక్టోబరు15న విడుదల కానుంది.