బలపడుతున్న ఎల్‌ నినో.. ప్రపంచానికి వాతావరణ హెచ్చరిక

2026 చివరి నాటికి గరిష్ఠ స్థాయికి చేరే అవకాశం

2027లోకి కొనసాగనున్న ప్రభావాలు.. అప్రమత్తత అవసరమంటున్న WMO

ప్రకృతి : ప్రపంచ వాతావరణ పరిస్థితులపై ఎల్‌నినో ప్రభావం మరోసారి ఆందోళన కలిగిస్తోంది. ఉష్ణమండల పసిఫిక్‌ సముద్రంలో అసాధారణంగా పెరుగుతున్న ఉష్ణోగ్రతల కారణంగా ఎల్ ‌నినో మరింత బలపడే సూచనలు కనిపిస్తున్నాయని ప్రపంచ వాతావరణ సంస్థ (WMO) వెల్లడించింది. సెప్టెంబర్‌ 3 న విడుదల చేసిన తాజా వివరాల ప్రకారం ... 2026 చివరి నాటికి ఎల్‌నినో గరిష్ఠ స్థాయికి చేరే అవకాశముంది. అనంతరం కూడా దాని ప్రభావాలు 2027లోకి కొనసాగవచ్చని WMO అంచనా వేసింది.

పసిఫిక్‌ జలాల్లో అసాధారణ వేడి ....

ఎల్‌నినోకు ప్రధాన కారణమైన ఉష్ణమండల పసిఫిక్‌ సముద్ర జలాలు సాధారణం కంటే గణనీయంగా వేడెక్కుతున్నాయి. ముఖ్యంగా మధ్య, తూర్పు భూమధ్యరేఖా పసిఫిక్‌ ప్రాంతాల్లో సముద్ర ఉపరితల ఉష్ణోగ్రతలు పెరుగుతున్నాయి. జూలైలో Niño 3.4 ప్రాంతంలో సముద్ర ఉపరితల ఉష్ణోగ్రత సాధారణం కంటే సుమారు 2°C అధికంగా నమోదైంది. జూలై చివరి నుంచి ఆగస్టు మధ్య వారాల్లో ఈ వ్యత్యాసం +2.2°C నుంచి +2.6°C వరకు పెరిగింది. సముద్రపు లోతుల్లో కొన్ని ప్రాంతాల్లో సాధారణం కంటే 8°Cకుపైగా అధిక ఉష్ణోగ్రతలు నమోదైనట్లు WMO తెలిపింది.

వర్షాలు.. కరువులు.. వేడిగాలులు ...

ఎల్‌నినో తీవ్రత పెరిగే కొద్దీ ప్రపంచంలోని పలు ప్రాంతాల్లో వాతావరణ పరిస్థితుల్లో మార్పులు చోటుచేసుకునే అవకాశం ఉంది. కొన్ని ప్రాంతాల్లో అధిక వర్షాలు, వరదల ముప్పు పెరగవచ్చు. మరికొన్ని ప్రాంతాల్లో వర్షాభావం, కరువు పరిస్థితులు ఏర్పడవచ్చు. అదే సమయంలో తీవ్రమైన వేడిగాలులు, హీట్‌వేవ్స్‌ ప్రమాదం కూడా పెరిగే అవకాశం ఉంది. అయితే ఎల్‌నినో బలంగా ఉన్నంత మాత్రాన ప్రపంచంలోని అన్ని ప్రాంతాల్లో ఒకే విధమైన ప్రభావాలు ఉండవని WMO స్పష్టం చేసింది. ప్రాంతం, కాలం, ఇతర సముద్ర–వాతావరణ పరిస్థితులను బట్టి దాని ప్రభావం మారుతుందని పేర్కొంది.

ఇండియన్‌ ఓషన్‌పైనా ప్రభావం ....

ఎల్‌నినోతో పాటు పాజిటివ్‌ ఇండియన్‌ ఓషన్‌ డైపోల్‌ (IOD) కూడా అభివృద్ధి చెందే అవకాశం ఉందని WMO అంచనా వేసింది. 2026 సెప్టెంబర్‌–నవంబర్‌ మధ్య IOD సగటు విలువ సుమారు +0.9°Cగా ఉండవచ్చని తాజా అంచనాలు సూచిస్తున్నాయి. ఎల్‌నినో, IODతో పాటు ఇతర సముద్ర పరిస్థితులు కూడా కలిసి వివిధ ప్రాంతాల్లో వర్షపాతం, ఉష్ణోగ్రతలను ప్రభావితం చేసే అవకాశం ఉందని WMO తెలిపింది.

ప్రపంచ ఉష్ణోగ్రతలకు మరో సవాలు ....

బలమైన ఎల్‌నినో ప్రపంచ సగటు ఉష్ణోగ్రతలను మరింత పెంచే అవకాశం ఉంది. 2023–24లో ఏర్పడిన బలమైన ఎల్‌నినో 2024ను రికార్డు స్థాయిలో అత్యంత వేడి సంవత్సరంగా నిలిచేందుకు దోహదపడిందని WMO గుర్తుచేసింది. ప్రస్తుత ఎల్‌నినో మరింత బలపడుతున్న నేపథ్యంలో.. రాబోయే నెలల్లో ప్రపంచ ఉష్ణోగ్రతలపై ప్రత్యేక దృష్టి పెట్టాల్సిన అవసరం ఉందని సూచించింది.

భారత్‌లో ముందస్తు సన్నద్ధత ....

ఎల్‌నినో ప్రభావాలను దృష్టిలో ఉంచుకుని భారత్‌ కూడా ముందస్తు చర్యలకు సిద్ధమవుతోంది. వ్యవసాయం, ఆరోగ్యం, నీటి వనరులు, విద్యుత్‌, ఆర్థిక రంగాలకు చెందిన కేంద్ర సంస్థలతో ఉన్నతస్థాయి సమీక్ష నిర్వహించినట్లు WMO తెలిపింది. వర్షపాతం లేదా ఉష్ణోగ్రతల్లో మార్పులు చోటుచేసుకుంటే వ్యవసాయం, నీటి లభ్యత, ప్రజారోగ్యంపై ప్రభావం పడే అవకాశం ఉంది. అందువల్ల ముందస్తు ప్రణాళికలు, సంసిద్ధతకు ప్రాధాన్యం పెరిగింది.

‘మన కళ్ల ముందే బలపడుతోంది’ ....

ఎల్‌నినో పరిణామాలపై ఐక్యరాజ్యసమితి ప్రధాన కార్యదర్శి ఆంటోనియో గుటెర్రెస్‌ కూడా ఆందోళన వ్యక్తం చేశారు. ఎల్‌నినో “మన కళ్ల ముందే అతిపెద్దదిగా మారుతోంది” అని పేర్కొంటూ.. సముద్ర ఉపరితల ఉష్ణోగ్రతలు, ప్రపంచ ఉష్ణోగ్రతలు పెరుగుతున్నాయని హెచ్చరించారు. ప్రపంచం తీవ్రమైన వాతావరణ పరిస్థితుల ప్రమాదకర దశలోకి వెళ్తోందని పేర్కొన్నారు. అయితే ఎల్‌నినో అంటే తప్పనిసరిగా విపత్తు సంభవిస్తుందని అర్థం కాదని WMO స్పష్టం చేస్తోంది. ముందస్తు అంచనాలు, హెచ్చరిక వ్యవస్థలు, విపత్తు నిర్వహణ చర్యలు, వ్యవసాయ–నీటి వనరులపై ముందస్తు ప్రణాళికల ద్వారా నష్టాన్ని తగ్గించవచ్చని తెలిపింది.

అప్రమత్తతే కీలకం ....

మొత్తంగా.. 2026 చివరి నాటికి ఎల్‌నినో గరిష్ఠ స్థాయికి చేరే అవకాశాలు ఉండటంతో ప్రపంచ దేశాలు అప్రమత్తంగా ఉండాల్సిన అవసరం ఏర్పడింది. దీని ప్రభావాలు 2027 ప్రారంభం వరకు కొనసాగే అవకాశం ఉన్న నేపథ్యంలో వర్షపాతం, ఉష్ణోగ్రతలు, వ్యవసాయం, నీటి వనరుల పరిస్థితులను నిశితంగా పర్యవేక్షించడం కీలకంగా మారింది.