54 మందికి గాయాలు, 18 మంది గల్లంతు
దోహా: ఖతార్లోని ప్రధాన సహజ వాయు ఎగుమతి కేంద్రం రాస్ లఫాన్ పారిశ్రామిక ప్రాంతంలో ఆదివారం రాత్రి భారీ పేలుడు సంభవించింది. ఈ ఘటనలో 54 మంది కార్మికులు గాయపడగా, మరో 18 మంది గల్లంతైనట్లు అధికారులు వెల్లడించారు. గల్లంతైన వారి కోసం సహాయక బృందాలు విస్తృతంగా గాలింపు చర్యలు చేపట్టాయి.
ఖతార్ ఎనర్జీ విడుదల చేసిన ప్రకటన ప్రకారం, రాస్ లఫాన్ పారిశ్రామిక ప్రాంతంలోని బర్జాన్ గ్యాస్ సప్లై సెంటర్లో పేలుడు సంభవించిన అనంతరం అగ్నిప్రమాదం చెలరేగింది. ప్రమాద సమయంలో నిర్వహణ, పునరుద్ధరణ పనులు జరుగుతున్నట్లు సమాచారం. ఇటీవల ప్రాంతీయ ఉద్రిక్తతల కారణంగా నిలిచిపోయిన కార్యకలాపాలను తిరిగి ప్రారంభించే క్రమంలో కార్మికులు పనులు నిర్వహిస్తుండగా ఈ ఘటన చోటుచేసుకుంది. ప్రమాదానికి గల ఖచ్చితమైన కారణాలను గుర్తించేందుకు అధికారులు దర్యాప్తు ప్రారంభించారు.
రాస్ లఫాన్ ప్రపంచంలోని అతిపెద్ద ద్రవీకృత సహజ వాయు (ఎల్ఎన్జీ) ఉత్పత్తి, ఎగుమతి కేంద్రాల్లో ఒకటిగా గుర్తింపు పొందింది. ఈ నేపథ్యంలో ప్రమాదం ప్రపంచ ఇంధన సరఫరా గొలుసుపై ప్రభావం చూపే అవకాశం ఉందని మార్కెట్ విశ్లేషకులు అభిప్రాయపడుతున్నారు. కాగా, హోర్ముజ్ జలసంధిలో ఇటీవల నెలకొన్న అనిశ్చిత పరిస్థితుల కారణంగా ఖతార్ కొంతకాలం తన ఎగుమతి కార్యకలాపాలను పరిమితం చేసింది. ఈ తాజా ఘటనతో అంతర్జాతీయ ఇంధన మార్కెట్లు మరింత అప్రమత్తమయ్యాయి.
ప్రమాదానికి సంబంధించిన పూర్తి వివరాలు, గల్లంతైన వారి పరిస్థితిపై అధికారిక సమాచారం రావాల్సి ఉంది.
కామెంట్లు (0)