వియత్నాంలో పడవ ప్రమాదం.. మృతుల్లో తెలుగు రాష్ట్రాల టూరిస్టులు

హనోయ్ (వియత్నాం) : వియత్నాంలో భారతీయ పర్యాటకులతో ప్రయాణిస్తున్న ఓ పడవ ప్రమాదానికి గురైంది. ఫు క్యూక్ ద్వీపం సమీపంలో జరిగిన ఈ ఘటనలో పలువురు గల్లంతైనట్లు సమాచారం. స్థానిక మీడియా కథనాల ప్రకారం .... 15 మంది వరకు మృతి చెందినట్లు తెలుస్తోంది. ప్రమాదానికి గురైన పడవలో ఆంధ్రప్రదేశ్, తెలంగాణ రాష్ట్రాలకు చెందిన పర్యాటకులు కూడా ఉన్నట్లు సమాచారం.

ఓ మొబైల్ ఫోన్ కంపెనీ తన డీలర్ల కోసం వియత్నాంలో వ్యాపార పర్యటనను ఏర్పాటు చేసింది. ఈ పర్యటనలో భాగంగా మొత్తం 250 మంది భారతీయ డీలర్లు పాల్గొన్నారు. వీరిలో ఆంధ్రప్రదేశ్‌కు చెందిన 35 మంది, తెలంగాణకు చెందిన 40 మంది ఉన్నట్లు తెలిసింది. ఈ పర్యటనలో భాగంగా మూడు పడవల్లో సముద్ర విహారానికి వెళ్లగా, శనివారం ఉదయం సుమారు 10.30 గంటల సమయంలో ఒక పడవ ప్రమాదవశాత్తు బోల్తాపడి మునిగిపోయినట్లు సమాచారం. ప్రమాదం సంభవించిన సమయంలో ఆ పడవలో 70 మందికిపైగా ప్రయాణికులు ఉన్నట్లు తెలుస్తోంది. వాతావరణ పరిస్థితులు ఒక్కసారిగా మారడం వల్లే ఈ ప్రమాదం జరిగి ఉండవచ్చని ప్రాథమిక సమాచారం సూచిస్తోంది. ఘటన జరిగిన వెంటనే సహాయక బృందాలు రంగంలోకి దిగి రెస్క్యూ చర్యలు చేపట్టాయి. పలువురిని రక్షించి ఆసుపత్రులకు తరలించగా, వారిలో కొందరు ఐసీయూలో చికిత్స పొందుతున్నట్లు సమాచారం. ఈ ప్రమాదంలో మచిలీపట్నానికి చెందిన ఓ మహిళ మృతి చెందినట్లు ఆమె కుటుంబ సభ్యులకు సమాచారం అందినట్లు తెలిసింది. అయితే ఈ విషయంపై అధికారిక నిర్ధారణ రావాల్సి ఉంది. మృతుల సంఖ్య, గల్లంతైన వారి వివరాలపై కూడా ఇంకా స్పష్టత లేదు. ఈ ఘటనపై వియత్నాంలోని భారత రాయబార కార్యాలయం స్పందించింది. సహాయక చర్యలను స్థానిక అధికారులతో కలిసి సమన్వయం చేస్తున్నట్లు తెలిపింది. బాధితులు, వారి కుటుంబ సభ్యులకు అవసరమైన సహాయం అందించేందుకు కంట్రోల్ రూమ్‌ను ఏర్పాటు చేసినట్లు వెల్లడించింది.