మాడ్రిడ్ : ప్రభుత్వ విద్యావ్యవస్థను పరిరక్షించాలని, విద్యారంగంలో బడ్జెట్ కోతలను నిలిపివేయాలని డిమాండ్ చేస్తూ స్పెయిన్ రాజధాని మాడ్రిడ్లో ఆదివారం సుమారు 10 వేల మంది భారీ ప్రదర్శన నిర్వహించారు. అక్టోబర్ 14న ప్రారంభం కానున్న ఉపాధ్యాయుల నిరవధిక సమ్మెకు మద్దతుగా ఈ ర్యాలీ జరిగింది. ప్రధాన ఉపాధ్యాయ సంఘాలు, విద్యా సంస్థలతో కలిసి ‘అసెంబ్లియా మెనోస్ లెక్టివాస్’ వేదిక ఆధ్వర్యంలో ఈ ప్రదర్శన జరిగింది. అటోచా నుంచి ప్రారంభమైన ర్యాలీ సిబెల్స్ వరకు భారీ ప్రదర్శన చేపట్టారు. నిరసనకారులు ఆకుపచ్చ చొక్కాలు ధరించారు. మాడ్రిడ్ ప్రాంతీయ అధ్యక్షురాలు ఇసాబెల్ డియాజ్ అయూసో ప్రభుత్వ విధానాలకు వ్యతిరేకంగా ప్లకార్డులు ప్రదర్శించారు. ‘మేము ప్రభుత్వ విద్యను కాపాడుకుంటాము.. మేము భవిష్యత్తును కాపాడుకుంటాము’ అనే బ్యానర్ను ప్రదర్శించారు. ‘ప్రతిఒక్కరి కోసం.. ప్రతిఒక్కరిచే ప్రభుత్వ విద్య’ అంటూ పలువురు నినాదాలు చేశారు. పోడెమోస్ యూరోపియన్ పార్లమెంట్ సభ్యురాలు ఐరీన్ మోంటెరో కూడా ప్రజా ప్రదర్శనలు, నిరసనలను మరింత విస్తరించాలని పిలుపునిచ్చారు.
ప్రభుత్వ పాఠశాలల్లో మెరుగైన పని పరిస్థితులు కల్పించాలని, తరగతి గదుల్లో విద్యార్థుల సంఖ్యను తగ్గించాలని, అదనపు వనరులు కేటాయించాలని ఉపాధ్యాయులు, కుటుంబాలు, విద్యా సంఘాలు డిమాండ్ చేశాయి.ప్రభుత్వ పాఠశాలల్లో బోధనా గంటలను తగ్గించాలని, విద్యార్థి-ఉపాధ్యాయ నిష్పత్తిని తగ్గించాలని, పాఠశాలలకు మరిన్ని నిధులు, సిబ్బంది, ఇతర వనరులు అందించాలని నిరసనకారులు డిమాండ్ చేశారు. ఉపాధ్యాయుల జీతాలు, పని పరిస్థితులను మెరుగుపరచడంతో పాటు తరగతి గదుల్లో వివక్షను ఎదుర్కొనేందుకు, విద్యార్థుల్లో వైవిధ్యాన్ని ప్రోత్సహించేందుకు అదనపు వనరులు కల్పించాలని కూడా వారు కోరుతున్నారు. ప్రభుత్వ విద్యా వ్యవస్థకు నష్టం కలిగించే విధానాలను, తమ పని పరిస్థితులను దిగజార్చే చర్యలను ఉపాధ్యాయులు, కుటుంబాలు చాలాకాలంగా భరిస్తున్నాయని నిరసనకారులు పేర్కొన్నారు.
కామెంట్లు (0)