వంట పాత్రలు, గిన్నెలు, ప్లేట్లు శుభ్రం చేయడానికి స్పాంజిని ఉపయోగిస్తుంటాం. వంటగది గట్టు తుడవడానికి కూడా చాలామంది దీన్నే వాడుతుంటారు. అయితే ఎన్నిరోజులైనా మార్చకుండా ఉపయోగించే ఈ స్పాంజి వల్ల అనారోగ్యం కలిగే అవకాశం ఉందని మీకు తెలుసా? అంట్లు తోమేటప్పుడు నూనె, కూర ముక్కలు, ఆహార అవశేషాలు స్పాంజిలో చిక్కుకుపోతాయి. ఉపయోగించిన తర్వాత సరిగ్గా ఆరబెట్టకపోతే తేమ పేరుకుపోతుంది. దీంతో స్పాంజిలోని చిన్న రంధ్రాల్లో సూక్ష్మజీవులు వృద్ధి చెందే అవకాశం ఉంటుంది.
స్పాంజిల్లో వివిధ రకాల బ్యాక్టీరియాలు కనిపిస్తాయి. వాటిలో సాల్మొనెల్లా, ఈ.కొలి వంటి హానికరమైన సూక్ష్మజీవులు కలుషిత ఆహారం ద్వారా శరీరంలోకి చేరితే విరేచనాలు, వాంతులు, కడుపునొప్పి వంటి సమస్యలు వస్తాయి. స్టెఫిలోకాకస్ వంటి బ్యాక్టీరియా కూడా ఇన్ఫెక్షన్లకు కారణమవుతుంది. అయితే ప్రతి స్పాంజిలోనూ ఈ సూక్ష్మజీవులన్నీ ఉంటాయని భావించకూడదు.
ఎలాంటి జాగ్రత్తలు తీసుకోవాలి?
స్పాంజిని ఉపయోగించిన ప్రతిసారీ శుభ్రంగా కడిగి, నీటిని పూర్తిగా పిండేయాలి. సింక్లో తేమగా వదిలేయకుండా గాలి తగిలే ప్రదేశంలో ఆరబెట్టాలి. దుర్వాసన వచ్చినా, రంగు మారినా వెంటనే మార్చాలి.
సాధ్యమైనంత వరకు అంట్లు తోమడానికి బ్రష్ ఉపయోగించడం మంచిది. అది త్వరగా ఆరిపోతుంది కాబట్టి సూక్ష్మజీవులు వృద్ధి చెందే అవకాశం తగ్గుతుంది.
స్పాంజిని మైక్రోవేవ్లో వేడి చేయడం లేదా డిష్వాషర్లో వేయడం ద్వారా సూక్ష్మజీవులను తగ్గించవచ్చు. అయితే అన్ని రకాల స్పాంజిలకు ఈ పద్ధతులు సురక్షితం కావు. తయారీదారు సూచనలు పాటించాలి. పొడిగా ఉన్న స్పాంజిని మైక్రోవేవ్లో పెట్టకూడదు. బ్లీచ్, ఇతర శుభ్రపరిచే రసాయనాలను కలిపి ఉపయోగించకూడదు.
పచ్చి మాంసం, చికెన్ కడిగిన నీటిని తుడవడానికి డిష్ స్పాంజిని ఉపయోగించకూడదు. దీనివల్ల సూక్ష్మజీవులు ఇతర పాత్రలకు, వంటగది ఉపరితలాలకు వ్యాపించవచ్చు.
సాధారణంగా ప్రతి ఒకటి నుంచి రెండు వారాలకు ఒకసారి స్పాంజిని మార్చడం మంచిది. అంతకంటే ముందే దుర్వాసన వచ్చినా, పాడైనా వెంటనే పారేయాలి.








కామెంట్లు (0)