సాధారణంగా లగేజీ బ్యాగులు, స్కూలు బ్యాగులు, పర్సులు వంటి వాటి జిప్లు తరచూ పాడైపోతుంటాయి. స్లైడర్, పళ్లు, ట్రాక్ కలిసి పనిచేసే జిప్ను పదేపదే బలంగా లాగడం, బ్యాగ్ను అవసరానికి మించి నింపడం, ఎక్కువకాలం ఉపయోగించడం వల్ల స్లైడర్ క్రమంగా వదులవుతుంది. దాంతో జిప్ పళ్లను సరిగ్గా పట్టుకోలేకపోతుంది. జిప్ పైకి వెళ్తున్నప్పటికీ వెనుక భాగంలో పళ్లు కలవకుండా విడిపోతుంటాయి. కొన్నిసార్లు దుమ్ము, దారాలు లేదా బట్ట ముక్కలు జిప్లో ఇరుక్కోవడం వల్ల కూడా అది సరిగ్గా పనిచేయదు. అయితే చిన్నచిన్న చిట్కాలతో ఈ ఇబ్బందుల నుంచి బయటపడవచ్చు.
జిప్ మూసిన తర్వాత కూడా పళ్లు మళ్లీ విడిపోతుంటే, స్లైడర్ పట్టు కొద్దిగా వదులవుతుంటే ముందుగా జిప్ను పూర్తిగా కిందికి తీసుకురావాలి. తర్వాత సన్నని ముక్కు ఉన్న ప్లయర్స్తో స్లైడర్ను రెండు వైపులా చాలా స్వల్పంగా నొక్కాలి. ఒకేసారి ఎక్కువ బలాన్ని ఉపయోగించకూడదు. కొద్దిగా నొక్కిన తర్వాత జిప్ను మళ్లీ పైకి లాగి చూడాలి. ఇంకా పళ్లు విడిపోతుంటే అవసరాన్ని బట్టి మరోసారి తేలికగా నొక్కాలి.
జిప్ మధ్యలో ఇరుక్కుంటే జిప్ను బలంగా లాగకూడదు. అలా చేస్తే స్లైడర్ విరిగిపోవచ్చు లేదా బట్ట దెబ్బతినవచ్చు. ముందుగా జిప్ పళ్ల మధ్య దారం, బట్ట లేదా వెంట్రుకలు చిక్కుకున్నాయేమో చూడాలి. కనిపిస్తే వాటిని నెమ్మదిగా తొలగించాలి. ఆ తర్వాత పెన్సిల్ కొనను జిప్ పళ్లపై రుద్ది, స్లైడర్ను మెల్లగా ముందుకు, వెనక్కి కదిలించవచ్చు. పెన్సిల్లోని గ్రాఫైట్ కొంతవరకు లూబ్రికెంట్లా పనిచేసి జిప్ కదలడానికి సహాయపడుతుంది.
జిప్ గట్టిగా కదులుతుంటే జిప్ పళ్లపై కొద్దిగా సబ్బు లేదా పెట్రోలియం జెల్లీ రాసి ప్రయత్నించాలి. లిప్ బామ్ను కూడా చాలా తక్కువ పరిమాణంలో ఉపయోగించవచ్చు. అయితే ఎక్కువగా రాయడం వల్ల బట్టపై మరకలు పడే అవకాశం ఉంటుంది కాబట్టి జాగ్రత్తగా ఉపయోగించాలి.
జిప్ పళ్లల్లో దుమ్ము, దారాలు, వెంట్రుకలు పేరుకుపోతే అది సులభంగా కదలదు. పాత టూత్బ్రష్తో జిప్ పళ్లను, స్లైడర్ చుట్టుపక్కల ప్రాంతాన్ని నెమ్మదిగా శుభ్రం చేయాలి. శుభ్రం చేసిన తర్వాత అవసరమైతే చాలా తక్కువ మొత్తంలో తగిన లూబ్రికెంట్ను ఉపయోగించాలి.
జిప్ ఎక్కువకాలం పనిచేయాలంటే జిప్ ఉన్న దుస్తులను వాషింగ్ మెషీన్లో వేయడానికి ముందు జిప్ను పూర్తిగా మూసివేయాలి. ప్రయాణ బ్యాగులు, సూట్కేసులను అవసరానికి మించి నింపకూడదు. జిప్ను బలవంతంగా లాగకుండా, ఇరుక్కుంటే ముందుగా కారణాన్ని గుర్తించి నెమ్మదిగా సరిచేయాలి. జిప్లో భాగాలు విరిగిపోయినా లేదా పళ్లు దెబ్బతిన్నా ఇంటి చిట్కాలకు బదులు రిపేరు చేయించుకోవడం ఉత్తమం.
కామెంట్లు (0)