శంకరన్న పాత్ర చేయాలంటే భయమేసింది

నాని, శ్రీకాంత్‌ ఓదెల కాంబినేషన్‌లో తెరకెక్కిన ‘ది ప్యారడైజ్‌’లో ప్రియదర్శి పోషించిన శంకరన్న పాత్రకు మంచి స్పందన వచ్చింది. హైదరాబాద్‌లో శనివారం జరిగిన సక్సెస్‌ మీట్‌లో దర్శకుడు శ్రీకాంత్‌ ఓదెల, ప్రియదర్శి ఈ పాత్ర గురించి మాట్లాడారు. ‘‘ఈ సినిమాలో శంకరన్న పాత్రను ప్రియదర్శి చేస్తాడో లేదో అనుకున్నాను. కానీ తనను కలిసి కథ చెప్పగానే ఓకే అన్నాడు. తనే కేసీఆర్‌ ఎలా ఉంటారో తెలుసుకుని నటించాడు’’ అని శ్రీకాంత్‌ ఓదెల చెప్పారు. ప్రియదర్శి మాట్లాడుతూ.. ‘‘ఒక నటుడిగా నన్ను నేను ఆవిష్కరించుకోవాలనే నాకు పొట్టు పొట్టు ఆకలి ఉంది. శ్రీకాంత్‌ ఫోన్‌ చేసి శంకరన్న పాత్ర చేయాలని చెప్పినప్పుడు చాలా భయమేసింది. కానీ భయమేసినప్పుడే చాలెంజ్‌ విలువ తెలుస్తుంది. అందుకే కాదనకుండా పాత్రను తీసుకున్నాను. శంకరన్న వేసుకునే బట్టలు ఎక్కడ దొరుకుతాయో వెతికి అబిడ్స్‌లో కొన్నాం. బట్టలు ఎలా ఉండాలి, చెప్పులు ఎలా వేసుకుంటారు, వాచ్‌ ఎలా పెట్టుకోవాలి అనే విషయాలపై దృష్టిపెట్టాం. మేకప్‌, ప్రోస్తటిక్‌ టీమ్‌ కూడా పాత్ర రూపకల్పనలో ఎంతో పనిచేసింది.’’ అని ప్రియదర్శి వివరించారు.