ముంబై: ఎయిర్ ఇండియాలో రూ.10,000 కోట్లకు పైగా పెట్టుబడి పెట్టేందుకు టాటా సన్స్ సిద్ధంగా ఉంది. ఈ పెట్టుబడికి కంపెనీ బోర్డు సూత్రప్రాయంగా ఆమోదం తెలిపినట్లు తెలుస్తోంది. టాటా సన్స్ అధ్యక్షుడు ఎన్. చంద్రశేఖరన్ నేతృత్వంలో జూన్లో జరిగిన బోర్డు సమావేశంలో ఈ నిర్ణయం తీసుకుంది. సమావేశానికి టాటా ట్రస్ట్స్ ఛైర్మన్ నోయల్ టాటా, వైస్ ఛైర్మన్ వేణు శ్రీనివాసన్ కూడా హాజరయ్యారు. ఎయిర్ ఇండియాలో టాటా సన్స్ మూలధన పెట్టుబడులు నిలిపివేసి ఏడాదికి పైగా అవుతోంది. 2025–26 ఆర్థిక సంవత్సరంలో విమానయాన సంస్థ నష్టాలు రెండింతలకు పైగా పెరిగి రూ.22,238 కోట్లకు చేరింది. దీంతో సంస్థ ఆర్థిక పరిస్థితిపై ఒత్తిడి పెరిగింది. టాటా సన్స్ 2025–26 వార్షిక నివేదిక ప్రకారం, ఎయిర్ ఇండియాలో పెట్టుబడుల విలువ రూ.22,618 కోట్ల వద్దనే ఉంది.
ఈక్విటీ ద్వారా నిధుల సమీకరణ నిలిచిపోవడంతో ఎయిర్ ఇండియా రుణాలు, ఇతర ఆర్థిక వనరులపై ఆధారపడుతోంది. సంస్థ 11 మంది రుణదాతల నుంచి సుమారు రూ.40,000 కోట్ల అప్పులు తీసుకుంది. ఇందులో స్టేట్ బ్యాంక్ ఆఫ్ ఇండియాకు అత్యధికంగా రూ.18,500 కోట్ల రుణ బాధ్యత ఉండగా, బ్యాంక్ ఆఫ్ బరోడాకు రూ.5,938 కోట్ల మేర బకాయిలు ఉన్నట్లు తెలుస్తోంది.
ప్రస్తుతం ఎయిర్ ఇండియాలో టాటా సన్స్కు 73.8 శాతం వాటా ఉంది. సింగపూర్ ఎయిర్లైన్స్ 24.7 శాతం, ఎస్బీఐ క్యాప్ ట్రస్టీ కంపెనీ ద్వారా ఉద్యోగులు సుమారు 1.5 శాతం వాటాను కలిగి ఉన్నారు. కొత్త పెట్టుబడి తర్వాత టాటా సన్స్ వాటా తగ్గకుండా ఉండాలంటే, సింగపూర్ ఎయిర్లైన్స్ తన వాటాను కొనసాగించేందుకు సుమారు రూ.3,350 కోట్లు పెట్టుబడి పెట్టాల్సి ఉంటుంది. సెప్టెంబర్ 11న జరగనున్న టాటా ట్రస్ట్స్ సమావేశం అనంతరం, ఎస్ఆర్టిటి మినహా టాటా సన్స్ బోర్డు సెప్టెంబర్ 17న సమావేశం కానుంది. ఈ సమావేశాల్లో ఎయిర్ ఇండియాలో ప్రతిపాదిత పెట్టుబడిపై మరింత స్పష్టత వచ్చే అవకాశం ఉంది.
కామెంట్లు (0)