ప్రశ్నార్థకమైన ఈసీఐ విశ్వసనీయత : మాజీ సీఈసీ అశోక్ లవాస

- ఎన్నికల సంఘం విశ్వసనీయతపై ప్రశ్నలు..

న్యూఢిల్లీ: ఓటర్ల పేర్లను తొలగించడంపై జరుగుతున్న ఆందోళనల నేపథ్యంలో భారత ఎన్నికల సంఘం (ఈసీఐ) విశ్వసనీయత ప్రశ్నార్థకంగా మారిందని భారత మాజీ ప్రధాన ఎన్నికల కమిషనర్ (సీఈసీ) అశోక్ లవాస అన్నారు. కోల్‌కతాలో జరిగిన ఒక బహిరంగ సభలో మాట్లాడుతూ, దేశంలోని ఓటర్ల జాబితా సవరణ ప్రక్రియలో జరుగుతున్న పరిణామాల వల్ల ప్రజల్లో ఆందోళన పెరుగుతోందని ఆయన పేర్కొన్నారు. ఓటర్ల జాబితా నుంచి పేర్లను తొలగించేందుకు పెద్ద సంఖ్యలో దరఖాస్తులు సమర్పించడం, ఓటర్ల నమోదు ప్రక్రియలో కొత్త నిబంధనలు, ఫారాల్లో మార్పులు వంటి అంశాలు వివాదానికి కారణమయ్యాయని లవాసా అభిప్రాయపడ్డారు. గతంలో ఓటర్ల జాబితాల సవరణ సమయంలో ఇలాంటి స్థాయిలో ప్రజల్లో ఆందోళన కనిపించలేదని అన్నారు. ఎన్నికల సంఘం చుట్టూ వివాదాలు పెరగడం వల్ల ప్రజల్లో ఆ సంస్థపై నమ్మకం దెబ్బతింటోందని ఆయన ఆవేదన వ్యక్తం చేశారు. ప్రజాస్వామ్యంలో ఎన్నికల సంఘం నిష్పక్షపాతంగా పనిచేయడం, ఓటర్ల హక్కులను కాపాడటం ఎంతో ముఖ్యమని పేర్కొన్నారు. ఎన్నికల ప్రక్రియపై ప్రజలకు నమ్మకం కలిగించేలా ఎన్నికల సంఘం వ్యవహరించాలని అశోక్ లవాసా సూచించారు. ఓటర్ల జాబితా సవరణలో పారదర్శకత పాటిస్తూ, ప్రజల సందేహాలను నివృత్తి చేయాల్సిన అవసరం ఉందని ఆయన అభిప్రాయపడ్డారు.