Print Editionదేశంలో తొలి హైడ్రోజన్‌ రైలు

• నేడు ప్రారంభించనున్న ప్రధాని మోడీ

న్యూఢిల్లీ : భారతదేశపు మొట్టమొదటి హైడ్రోజన్ ఆధారిత ఫ్యూయల్ సెల్ రైలును ప్రధానమంత్రి నరేంద్ర మోడీ శుక్రవారం జెండా ఊపి ప్రారంభించనున్నారు. హర్యానాలోని జింద్‌లో శుక్రవారం ఉదయం ఈ కార్యక్రమం జరగనుంది. ప్రధాని నరేంద్ర మోడీ శుక్రవారం హర్యానా, చండీగఢ్, పంజాబ్‌లలో పర్యటించనున్నారు. ఈ పర్యటనలో ప్రధాని రూ. 25 వేల కోట్లకు పైగా విలువైన కార్యక్రమాలు, పథకాలను ప్రారంభించనున్నారు. ఇందులో హైడ్రోజన్‌ ‌రైలు ప్రారంభం ఒకటి. ఈ రైలును పూర్తిగా స్వదేశీ పరిజ్ఞానంతో రూపొందించారు. పది కోచ్‌ల ఈ రైలు 3,200 హార్స్‌పవర్ (హెచ్‌‌పి) ప్రొపల్షన్ సిస్టమ్‌తో నడవడంతోపాటు ప్రపంచంలోనే అత్యంత పొడవైన, అత్యంత శక్తివంతమైన హైడ్రోజన్ ఇంధనంతో నడిచే ప్యాసింజర్ రైలు సెట్‌లలో ఒకటి. ఈ రైలు హైడ్రోజన్, వాతావరణంలోని ఆక్సిజన్ మధ్య జరిగే రసాయన చర్య ద్వారా నీటి ఆవిరిని తయారు చేసుకుని, తనంతట తాను విద్యుత్తును ఉత్పత్తి చేసుకుంటుంది. అనంతరం జలంధర్‌‌లో పర్యటించనున్న ప్రధాని వివిధ రాష్ర్టాల్లో అధునీకరించిన 75 రైల్వే స్టేషన్లను ప్రారంభించనున్నారు.